Mbesa e heroit Hakif Zejnullahu, kandidate për asambleiste (Foto)

Florentë Zejnullahu këtë vit synon të sigurojë një ulëse në asamblenë komunale të Podujevës.

Zejnullahu ka treguar gatishmërinë e saj të angazhohet pandalshëm në të mirën e gjithë qytetarëve të vendit.

Ajo ka thënë se angazhimi i saj konkret në zgjidhjen e problemeve të shumta është vullneti dhe dëshira për ta bërë komunën e Podujevës një vend më të mirë, për t’u marrë edhe me problemin më të vogël të secilit qytetar.

Florenta thotë se punën për të mirën e të gjithëve e ka trashëguar nga familja, e dëshmuar me decenie të tëra në këtë fushë.

Vlen të përmendim faktin se Florenta ndryshe është edhe mbesa e heroit Hakif Zejnullahu, i cili nuk kurseu jeten e tij për të mirën e këtij vendi.

Shkrimi i plotë i Zejnullahut:

Të dashur qytetarë, familjarë dhe miq Unë Floretë(Bajram)Zejnullahu kam pranuar sfidën për të qenë kandidate për Asamblenë Komunale të Podujevës, në zgjedhjet që mbahen më 22 tetor. E vetëdijshme për përgjegjësinë e madhe, por e gatshme për angazhim të pandalshëm dhe sakrificë për të mirën e të gjithë qytetarëve të komunës sonë. Punën për të mirën e të gjithëve e kam trashëguar nga familja, e dëshmuar decenie të tëra në këtë fushë.Angazhimi im konkret në zgjidhjen e problemeve të shumta është vullneti dhe dëshira ime për ta bërë komunën tonë një vend më të mirë, për t’u marrë edhe me problemin më të vogël të secilit qytetar. Qytetarët llapjanë kanë shumë probleme dhe ato janë të dukshme në shumë fusha. Ne duhet t’i zgjidhim ato. Partia Demokratike e Kosovës, që më ka kandiduar mua, ka vullnetin, dëshirën, dijen dhe ekspertizën e nevojshme për ta bërë këtë. Për mua personalisht, fokusi do të jenë femrat dhe të rinjtë. Femra llapjane, e të gjitha moshave, është e margjinalizuar. Ka fare pak mundësi ta japë kontributin e saj për zhvillimin e përgjithshëm të komunës dhe për përmirësimin e jetës së qytetarëve. E ne kemi kaq shumë intelektuale, kaq shumë profesioniste, në të gjitha fushat. Do t’ua hapim rrugën atyre. Sepse edhe dinë, edhe duan të punojnë. Sepse është e dëshmuar se ato janë më të përgatitura, më të gatshme, më të zonjat për të zgjidhur problemet e qytetarëve. Të rinjtë, nga ana tjetër, janë pasuria më e madhe e gjithë vendit tonë, rrjedhimisht edhe e komunës së Podujevës. Statistikisht, moshës së re i takon më shumë se gjysma e popullsisë. Por, si trajtohen ata, a kanë hapësirë të duhur për të treguar dijen dhe aftësitë e tyre? Deri sot, vetëm një përqindje e vogël e të rinjve e kanë gjetur veten në detyra në shërbim të shoqërisë. Të tjerët janë lënë anash, merren me punë dytësore ose kanë bërë zgjidhje duke punuar jashtë komunës sonë. Kjo qasje ndaj të rinjve duhet të marrë fund. Askush më mirë se të rinjtë nuk e di çka i duhet kësaj shoqërie, askush më shumë se të rinjtë nuk ka vullnet për të kontribuuar për vendin e vet, më shumë se të rinjtë askush nuk e do të sotmen dhe të ardhmen e komunës sonë. Unë jam këtu, me të gjithë kolegët e mi, për të ofruar një qeverisje ndryshe, për t’iu hapur rrugë të rinjve dhe femrave, të gjithë atyre që duan një jetë më të mirë për të gjithë, një Podujevë më të zhvilluar, një rajon të Llapit si shembull për t’u mburrur me të.