Autoritetet amerikane gjeten 23 armë, përfshirë edhe një pistoletë, në dhomën e hotelit të sulmuesit, i cili dje u identifikua nga policia si Stephen Paddock, 64-vjeçar. Disa prej armëve kishin shënjestra, mjete këto që e ndihmojnë qitësin t’i identifikojë caqet e tij në largësi, ka thënë policia, transmeton Express.

Po ashtu, policia gjeti 19 armë zjarri plus eksplozivë dhe disa mijëra karikatorë të mbushur me municion në shtëpinë e Paddock në Mesquite, Nevada.

Për më tepër, janë gjetur edhe mjete elektronike, ka shtuar policia, duke mos i shpjeguar ato.

Ndërsa, në makinën e tij janë gjetur disa kilogramë nitrat, i cili është material që përdoret për të ndërtuar eksplozivë.

Stephen Paddock u gjet i vdekur në dhomën e hotelit nga ku e kreu sulmin. Policia beson se ai kreu vetëvrasje.

ISIS e ka marrë përgjegjësinë për sulmin duke e përshkruar Paddockin si ushtar të Shtetit Islamik.

Por, FBI dhe autoritet amerikane e kanë përgënjeshtruar grupin terrorist duke thënë se nuk ka asnjë provë që dëshmon se Paddock kishte lidhje me terrorizëm apo ndonjë organizatë terroriste. /Express/