Lushtaku në mbledhjen e Keshillit Drejtues: PDK duhet të qëndrojë në seancë ditën kur Vjosa Osmani votohet për presidente!

Dy ditë më parë, Këshilli Drejtues i Partisë Demokratike të Kosovës ( PDK) mbajti mbledhjen maratonë ku u vendos që nuk do të mbështesin kandidaturën e Vjosa Osmanit për Presidente.

Mbledhja e Këshillit Drejtues zgjati disa orë me radhë dhe shumica e anëtarëve ishin unanim në vendimin e tyre me përjashtim të një anëtari.

“Gazeta Blic” nga burimet e saj brenda Këshillit Drejtues merr vesh se anëtari i Këshillit Drejtues njëherësh deputeti i PDK-së, Mërgim Lushtaku ka qenë i vetmi që ka kërkuar që PDK-ja të qëndrojë në seancë në ditën e votimit të Vjosa Osmanit për Presidente.

“Gazeta Blic” ka provuar të kontaktojë me Lushtakun për ta pyetur më gjerësisht në lidhje me këtë qëndrim të tij por i njëjti nuk ka qenë i qasshëm në thirrjen tonë.

Pas mbledhjes së Këshillit Drejtues ishte UD. i detyrës së kryetarit të PDK-së, Enver Hoxhaj që bëri të ditur se ky subjekt politik ka vendosur që nuk do ta mbështesin Vjosa Osmanin për Presidente.

Edhe nga Aleanca për Ardhmërinë e Kosovës janë deklaruar se nuk do ta mbështesin Vjosa Osmanin për Presidente.

Ndërsa nga Lidhja Demokratike e Kosovës pas mbledhjes së mbajtur sot mes Lumir Abdixhikut, Albin Kurtit dhe Vjosa Osmanit u tha se pritet që javën e ardhshme të takohet sërish kryetari i LDK-së me pretendenten për Presidente për të komunikuar rreth kësaj çështjeje.

Kanidati për kryeministër Albin Kurti dhe kandidatja për Presidente Vjosa Osmani kanë zhvilluar takime me UD e detyrës së kryetarit të PDK-së Enver Hoxhaj, kryetarin e AAK-së Ramush Haradinaj, kryetarin e LDK-së, Lumir Abdixhiku dhe përfaqësuese të komuniteteve dhe Listës Serbe.