Loja me filxhanë në odat llapjane |Video

Më të moshuarit e odës zunë vendet e tyre e po e bëjnë shpjegimin e lojës me filxhanë. Lojërat tradicionale janë lojëra që janë luajtur në odat shqiptare e edhe sot vazhdojnë të luhen në shoqatën “Flaka e Llapit” në Podujevë. Fadil Halili është 75-vjeçari i cili njihet si lojtar i mirë e shpeshherë ditët i kalon bashkë me shokët e tjerë duke luajtur.

Kalimi i kohës në oda për Halilin është ndjenjë e veçantë, sepse ai i rikujton ditët e rinisë të mbushura me këngë e lojë. Ai veçon lojën me filxhanë si më atraktiven, pasi që të gjithë pjesëmarrësit mund të inkuadrohen.

Halili flet për interesimin e të rinjve e rikthimin e traditave, për të cilat thotë se nga secila kohë duhet të marrim vetëm të mirat.

Loja me filxhanë është vetëm një nga shumë lojërat, të cilat luhen në shoqatë. E mundësinë e rikujtimit të traditës ua ka mundësuar Nebih Balaj, themelues i shoqatës. Vitet e 90-ta ishin pikënisja e aktiviteteve, të cilat nuk ndaluan as sot e kësaj dite.

I gjithë koncepti është i ndërtuar bazuar në odat e vjetra shqiptare.

Themeluesi është kujdesur që edhe orenditë të jenë të vjetra e të trashëguara.

Koncertet, festivalet e lojërat janë ndër aktivitetet kryesore të shoqatës. Andaj krahas lojës me filxhan, Balaj numëron edhe të tjera lojëra që argëtojnë mysafirët.

“Flaka e Llapit” është shndërruar edhe në muze, sepse ka shumë eksponate të cilat vetë themeluesi i ka mbledhur e i ruan. Ai tregon se ka shumë vizitorë të vendeve të ndryshme që interesohen të dinë për traditën shqiptare.

Rikujtimi, ruajtja, trashëgimia e argëtimi janë qëllimet kryesore të shoqatës e anëtarëve të saj, të cilët me raste i zë nata duke biseduar e luajtur.