Llapjani nuk e lë rehat ish-gruan, i kërkon të bashkohen pasi u ndanë – ajo e denoncon në Polici

Shpeshherë për çiftet kosovare telashet nuk marrin fund me shkurorëzim. Shumë nga ta vazhdojnë të kenë probleme me ish-partnerët e tyre, të cilët nuk arrijnë ta pranojnë ndarjen. Si pasojë e telasheve të vazhdueshme janë gratë ato që kryesisht kërkojnë ndihmën e Policisë, raporton Gazeta Sinjali.

Disa raste të tilla i ka denoncuar së fundmi një grua nga Lupçi i Podujevës, e cila ka vendosur që dje ta denoncojë në Polici ish bashkëshortin e saj me të cilin kishte qenë e martuar për një kohë.

Burimet brenda Prokurorisë kanë bërë me dije se 32-vjeçari po dyshohet se vazhdimisht e ka shqetësuar ish gruan, të cilën e ka kontaktuar përmes rrjeteve sociale, duke i kërkuar të kthehen bashkë.

Përballë kësaj situate, ajo ka vendosur që ta raportojë rastin në Polici, ku ka rrëfyer për presionin që ka përjetuar këtë kohë nga ish burri, përkundër që posedon urdhër mbrojtjeje.

Si rezultat i denoncimit, njësitet policore janë vënë në lëvizje me ç’rast kanë arritur që ta arrestojnë personin e dyshuar, i cili u shoqërua në stacion policor për intervistim.

Pas përfundimit të procedurave policore, Prokurori i Shtetit ka nxjerrë vendim që i njëjti të ndalohet dhe ndaj tij të iniciohet rasti nën dyshimet për kryerjen e veprës penale ‘Dhunë në familje’.