Libri për UÇK-në në Zonën e Llapit që po përdoret në Hagë, flet autori

Julius Von Boné, avokat i Salih Mustafës, dje në konferencën e sotme të Dhomave të Specializuara lidhur me procesin e gjykimit të klientit të tij, ka përmendur një libër, që sipas tij, Prokuroria e Specializuar po e përdor kundër ish-eprorit të UÇK-së.

T7 sot e ka intervistuar Skënder Zhitinë, autorin e librit “Ushtria Çlirimtare e Kosovës – Zona Operative e Llapit”, për pjesë të së cilit, avokati i Salih Mustafës ka thënë se është pyetur klienti i tij.

Zhitia nën emocione të forta, ka treguar se pikërisht falë këtij libri, ai kishte arritur ta marrë gradën akademik në fushën e Historisë.

“Kur unë u regjistrova ne studime post-diplomike në magjistraturë, atëherë ju drejtova Këshillit Drejtues të UP-së, Fakultetit Filozofik, Departamenti i Historisë që të më ofrohet mundësia që të merrem me një studim të tillë në kuadër për me u mbrojtë si temë diplome për magjistër të shkencave të historisë, një gjë e tille m’u aprovua, që ishte një kënaqësi për mua, një ndjenjë e jashtëzakonshme”, ka thënë ai.

Në vitin 2008, ai botoi dhe promovoi librin e tij në Bibliotekën Kombëtare “Pjetër Bogdani”, ndërsa pas më shumë se 1 dekade, segmente të caktuara të kësaj vepre duket se do t’i hyjnë në punë edhe dikujt tjetër. Bëhet fjalë, për Prokurorët e Zyrës së Prokurorit të Specializuar në Hagë, që po e ndjekin penalisht ish-pjesëtarin e UÇK-së, Sali Mustafën.

Autori i këtij libri mohon se në këtë vepër ka diçka që inkriminon ushtarët e UÇK-së.

“Për aq sa na e kemi kujtesë dhe brenda kopertinave të librit e dimë, ky është një libër shkencor në të cilin nuk mund të gjesh diçka inkriminuese. Është shpalosja e një lufte në Zonën Operative te Llapit”, ka thënë Zhitia për T7.

Autori thotë se për këtë libër ishin në dijeni nga ushtari i thjeshtë e deri te komandantët e Zonës Operative të Llapit, ndërsa atë e konsideron si vepër të përbashkët me luftëtarët.

“Në njëfarë mënyre, kjo është një vepër e përbashkët e të gjithë pjesëtarëve të Zonës Operative të Llapit, sepse gjithçka është përgatitur në harmoni, në bashkëpunim me qellim që ta pasqyrojme luftën e drejtë të popullit shqiptar në Kosovë, të udhëhequr nga UÇK-ja”, thotë ai.

Më 27 gusht të këtij viti, autori i këtij libri, Skënder Zhitia, është intervistuar nga Zyra e Prokurorit të Specializuar. /GazetaExpress/