Lëndohet punëtori i një kompanie, pronari thotë se “e ka pre gishtin pak me xham”

Punëtorët në Kosovë përballen me sfida të shumta, e ndër to janë edhe kushtet në vendet e punës dhe rreziku që u kanoset. Jo rrallëherë ata e pësojnë keq, madje edhe tragjikisht, qoftë në ndërtimtari, apo edhe në sektorë të tjerë, raporton Gazeta Sinjali.

Kështu e ka pësuar dje një punëtor i kompanisë ‘Li-Bes GLASS PVC’ në Ferizaj, i cili si pasojë e lëndimeve të marra në vendin e punës, është dërguar me urgjencë në Emergjencën e Qendrës Kryesore të Mjekësisë Familjare në Suharekë.

Burimet e Gazetës Sinjali brenda Emergjencës kanë bërë me dije se 25-vjeçari është dërguar në spital me lëndime në gisht.

Për rastin ka folur pronari i kompanisë, Liridon Asllani i cili thotë për Sinjalin se punëtori ” e ka pre pak gishtin” dhe se ndihmën e parë e ka marrë nga stafi.

“Njoni që u lëndu e ka pre gishtin pak me xham, nuk ka pas nevojë me dërgu në spital… nidhmën e parë çka ja kemi jep ja kemi lidh dorën edhe s’ka pas diçka ma shumë”, tha Asllani.

Ndërsa, për rastin ka njoftuar edhe Policia e Kosovës ku thuhet se punëtori është dërguar në Emergjencë dhe rasti është duke u hetuar nga njësit përkatëse.

“Viktima mashkull kosovar ka kërkuar ndihmë mjekësore në Emergjencën e Ferizajt, pasi që ishte lënduar në vendin e tij të punës. Njësit përkatëse janë duke hetuar rastin”, thuhet në raportin e Policisë.