LDK në Podujevë publikon listën me 39 kandidatë për asamblenë komunale

Lidhja Demokratike e Kosovës në Podujevë ka publikuar sot listën me 39 kandidatë për Asamblenë Komunale, me të cilën do të garojë në zgjedhjet e 12 tetorit.

Kryetari i Degës së LDK-së, njëherit kandidat për kryetar komune, Ekrem Hyseni, ka bërë të ditur se lista është e përbërë nga profesionistë të fushave të ndryshme, të cilët sipas tij e kanë dëshmuar veten në punën dhe kontributin e tyre për qytetin.

“Është lista e përfaqësimit të dinjitetshëm! Është lista e fitores! Është lista që buron drejtpërdrejt nga kërkesat dhe vullneti i qytetarëve të Podujevës, veprimtarëve e anëtarëve të Lidhjes Demokratike të Kosovës,” – ka deklaruar Hyseni.

Ai u ka bërë thirrje qytetarëve që në zgjedhjet e 12 tetorit të përkrahin secilin kandidat të kësaj liste, duke theksuar se të gjithë janë “njerëzit tuaj, për ju dhe zëri juaj” dhe se do të jenë në shërbim të interesit qytetar.

Publikimi i listës shënon një tjetër hap të rëndësishëm në garën zgjedhore, ku partitë politike në Podujevë po synojnë të sigurojnë mbështetje për përfaqësim në asamble.