LDK ka 2 kushte për t’ju bashkuar bisedimeve në Bruksel

Lidhja Demokratike e Kosovës (LDK) po i afrohet qëndrimit të përbashkët për bisedimet në Bruksel. Nënkryetari i parë i kësaj partie, Lutfi Haziri ka paraqitur dy kushtet të cilat do ta unifikonin pozitë-opozitë ndaj Serbisë, që përfshin garancat nga Shtetet e QUINT’it dhe Amerikës, transmeton Gazeta Metro.

Nënkryetari i Lidhjes Demokratike të Kosovës, Lutfi Haziri, tha për Radion Evropa e Lirë, se LDK-ja pavarësisht kërkesave të ndryshme që të jetë pjesë e dialogut, nuk ka ndryshuar mendje.

“Qëndrimi i LDK-së nuk ka ndryshuar asgjë nga takimi i fundit që ne kemi pasur me Kryesinë dhe Këshillin e Përgjithshëm të LDK-së. Pra, LDK-ja e ka ofruar platformën e saj për parimet e dialogut dhe mënyrën se si e sheh të kornizuar një dialog në vija të njëjta me parimet negociuese që grupi i Quint-it i ka miratuar në verën e vitit 2018. Dhe, ne legjitimitetin politik nuk mund t’ia japim [Qeverisë dhe Ekipit Negociator] sepse ai nuk falet, legjitimiteti politik ose fitohet me zgjedhje ose me marrëveshje politike”, theksoi Haziri.

Anëtarët e Ekipit Negociator të Kosovës pritet që më 8 janar të kenë një takim në Bruksel me zyrtarët e Bashkimit Evropian për t’i informuar ata me ecurinë e përgatitjeve në Kosovë për procesin e dialogut me Serbinë.

Pjesë e këtij ekipi nuk pritet të jenë përfaqësuesit nga dy partitë opozitare, përkatësisht nga Lidhja Demokratike e Kosovës dhe Lëvizja Vetëvendosje./