LDK-ja konteston ligjshmërinë e Rregullores për institucionet edukative-arsimore në Podujevë

Të jashtëligjshme po e konsiderojnë përfaqësues të Lidhjes Demokratike në Podujevë Rregulloren e re për institucionet edukative-arsimore në këtë komunë.

Dokumenti, i cili është miratuar në seancën e fundit të Kuvendit Komunal, ata kanë thënë se bie ndesh me Ligjin për zyrtarët publikë, me atë të punës dhe me dokumente të tjera të nivelit qendror.

Qëndrim Softolli, këshilltar komunal i LDK-së në Podujevë, ka theksuar se me këtë rregullore pushteti lokal ia rrit vetes kompetencat, të cilat mund t’i përdorë kundër punonjësve arsimorë.

“E shohim si Rregullore më shumë e rritjes së kompetencave të drejtorit, drejtorëve të shkollave dhe Komisionit disiplinor të DKA-së për shantazhimin dhe kërcënimin e punëtorëve të sektorit të arsimit. Gjatë seancës kam paraqitur shkeljet ligjore, ku i kanë bërë gjatë hartimit të kësaj rregulloreje”, tha Softolli.

Akuzat e ngritura i kanë mohuar zyrtarët komunalë në Podujevë. Zëdhënësi Fatri Zhitia ka thënë se rregullore të ngjashme janë miratuar edhe në disa komuna të tjera.

“Kjo akuzë është e paqëndrueshme, për shkak se edhe komunat e tjera e kanë praktikuar një rregullore të tillë dhe ne po synojmë që përmes kësaj rregulloreje të shtohen kompetencat e drejtorit të shkollës, që si menaxher kryesor i një institucioni arsimor t’i shtohen kompetencat me qëllim që ai të ketë kontroll më të madh dhe kompetenca shtesë me synimin e vetëm që shkolla të funksionojë sa më mirë”, tha Zhitia.

Zhitia ka bërë të ditur se Komuna është në pritje të verifikimit të ligjshmërisë së dokumentit nga niveli qendror. Pas kësaj, ai ka thënë se do të nisë zbatimi i Rregullores.

E këshilltari Softolli ka njoftuar për deponimin e një ankese lidhur me çështjen në Ministrinë e Administrimit të Pushtetit Lokal dhe ka thënë se nuk pret që Rregullorja të jetësohet.