LDK e VV nuk i binden as ambasadorëve Kosnnet e O’Conell

Dy partitë opozitare LDK dhe VV, kanë vendosur të mos marrin pjesë në takimin e sotëm të krerëve të shtetit, bashkë me ambasadorët e shteteve të QUINTIT, temë e së cilit kanë qenë edhe dialogu dhe taksa 100%.

Ndonëse në takim bashkë me presidentin, kryeministrin e ambasadorët, ishin të ftuar edhe opozita, këta të fundit e bojkotuan edhe këtë, shkruan gazetametro.net.

Sidoqoftë, duke u bazuar në qëndrimet e deritanishme të këtyre dy subjekteve opozitare, refuzimi i një ftese të tillë ishte i pritur.

Dy partitë opozitare refuzuan të shkojnë edhe në takimin e thirrur dje në Kuvend nga kryeparlamentari, Kadri Veseli, për qëllim të koordinimit rreth dialogut Kosovë-Serbi.

Ani pse janë thirrur të bëhen pjesë e ekipit për procesin e dialogut, LDK dhe VV kanë deklaruar se janë kundër një procesi të tillë, në këtë vijë që është zhvilluar deri më tani.

Madje, LDK dje deklaroi se do të shkonte në dialog me Serbinë vetëm me një kusht, që është shkuarja në zgjedhje.

Ndryshe, në këtë takim morën pjesë edhe ambasadori i SHBA’së në Kosovë, Philip Kosnett, ambasadori i Britanisë së Madhe, Ruairi O’connell si dhe ambasadorët e vendeve tjera dhe përfaqësues të Zyrës së BE’së në Kosovë./