Largoni helmet nga organizmi me këtë dietë

Lëngjet e freskëta nga pemët dhe perimet mund të ndihmojnë që me shpejtësi ta pastroni organizmin dhe të hiqni disa kilogramë shtesë.

Por, kurrsesi mos planifikoni që në mënyrë ambicioze përmes këtij regjimi rigoroz të qëndroni më shumë se disa ditë, në të kundërtën dëmi do të jetë më i madh sesa vetë dobia. Më së miri do të ishte që këtë dietë ta mbani gjatë fundjavës dhe atë më së gjati një ose dy ditë.

Kjo kohë mjafton për ta liruar organizmin nga materiet e dëmshme dhe helmet e grumbulluara. Rregulli kryesor është që ditën ta filloni me lëng të freskët të shtrydhur, nga agrumet apo portokajtë.

Në gotën me lëng të shtrydhur shtoni dy decilitra ujë të vakët, e përzieni dhe e konsumoni. Kjo dietë ju sugjerohet sidomos atyre personave që kanë një organizëm të ngadalshëm, sepse metabolizmi i ngadaltë, tretja jo e mirë, pastrimi jo i rregullt i zorrëve, sjellin deri në grumbullimin e helmeve në organizëm dhe ngadalësojnë eliminimin e dhjamit.

Limoni në raste të tilla ka efekt të mirë, sidomos kur merret në mëngjes dhe duke përgatitur mëlçinë, laboratorin më të rëndësishëm natyror për ta kryer funksionin e vet. Më së miri do të ishte që për këtë dietë të përgatiteni paraprakisht, duke blerë pemë të mjaftueshme.

Do të ishte mirë që lëngun ta konsumoni menjëherë pasi ta keni shtrydhur, por një gjë të tillë mund ta bëni edhe në mëngjes, duke përgatitur gjithë dozën e mjaftueshme për gjithë ditën.

Nëse kjo për ju është tepër e komplikuar, lëngjet mund t’i përgatisni paraprakisht, por duhet ta dini se me këtë rast humbni disa nga vitaminat. Nëse dikush pëlqen kombinimet, mundet që në vend të ujit të vakët të shtojë jogurt pa yndyrë apo edhe qumësht.

Për mbajtjen e kësaj diete, edhe pse është mjaft e shkurtër, nevojitet vullnet dhe që në organizëm të mos konsumohet gjë tjetër pos lëngjeve dhe eventualisht ndonjë supë të pastër me perime, pa shtesa apo erëza. Një dietë si kjo ju sugjerohet sidomos atyre personave të cilët paraprakisht kanë konsumuar ushqime të rënda.

Çka/kur duhet të hani:

Kafjalli: lëng limoni dhe portokalli

Dreka: lëngje nga lloje të ndryshme të perimeve

Darka: lëng trangulli.