Vdes mamia llapjane Sanije Topanica, iu ndihmoi grave në lindje gjatë luftës
Lajm i rëndësishëm për pensionistët kosovarë, kjo gjë do të ndodhë këtë muaj
Pensionistët kosovarë nuk do t’i marrin penisonet e tyre me rritje gjatë muajit janar, përkundër faktit se ishte paraparë një rritje prej 15 deri në 20 përqind nga pensioni bazë, transmeton Gazeta Metro.
Kjo për arsye se nuk është miratuar ende në lexim të dytë projektbuxheti për vitin 2019.
Lulëzim Rafuna, këshilltar i ministrit të Financave, Bedri Hamza ka thënë për KosovaPress se pensionistët do t’i marrin pensionet me rritje në mënyrë retroaktive pas aprovimit të buxhetit 2019.
Ndërsa, edhe zyrtarë të Ministrisë së Punës dhe Mirëqenies Sociale kanë thënë për KosovaPress, se nuk do të ketë pensione me rritje pa miratimin e buxhetit 2019.
Ndryshe, ekzekutimi i pensioneve bëhet zakonisht më datën 23-24 për çdo muaj, ndërsa Kuvendi i Kosovës ka paraparë që më 31 janar të mbajë seancë plenare për ta votuar në lexim të dytë projektbuxhetin prej 2.3 miliard, të cilin në lexim të parë e kishin votuar më 21 dhjetor 2018.
Sipas të dhënave ende jozyrtare, pensionet e pleqërisë, ata që marrin nga 75 euro aktualisht, me buxhetin e ri do të marrin 90 euro. Kurse pensionistët kontribut- pagues nga shuma prej 230 eurove, do të marrin 34 euro më shumë në muaj.
Numri i përgjithshëm i pensionistëve në vend është rreth 170 mijë, prej tyre 125 mijë janë shfrytëzues të pensionit të pleqërisë, që marrin nga 75 euro në muaj, ndërsa 45 mijë janë kontribut-pagues, që ndahen në katër kategori, të cilët marrin nga 158 deri në 230 euro në muaj në bazë të përgatitjes së shkollimit.