Lajm i mirë për Orllanin: Fillon restaurimi i xhamisë së vjetër – do të shndërrohet në muze

Trashëgimia kulturore e trevës së Llapit po merr vëmendjen e merituar përmes një projekti madhor që synon ruajtjen e memories sonë kolektive. Sot kanë nisur zyrtarisht punimet për restaurimin e Xhamisë së vjetër në fshatin Orllan, një monument i çmuar i shekullit XVIII, i cili ishte dëmtuar rëndë gjatë luftës së fundit në vitin 1999.

Për të parë nga afër nisjen e këtij projekti, vendpunishten e vizituan Ministrja e Kulturës dhe Turizmit, znj. Saranda Bogujevci, Kryetari i Komunës së Podujevës, z. Shpejtim Bulliqi, Kryetari i KBI-së, Mensur ef. Hoti, Kryeimami i BIK-ut, Vedat ef. Sahiti, si dhe Sekretari i Ministrisë, z. Bislim Bislimi. Ky bashkëpunim institucional dëshmon rëndësinë që ka ky monument për historinë dhe kulturën e vendit tonë.

Projekti i restaurimit kap vlerën e rreth 500 mijë eurove dhe është projektuar me kujdes të veçantë për të ruajtur arkitekturën origjinale të objektit. Pas përfundimit të punimeve, xhamia nuk do të jetë vetëm një monument i mbrojtur, por do të shndërrohet në një hapësirë muzeale të hapur për publikun, duke u bërë një pikë referimi për vizitorët dhe studiuesit.

Ky restaurim përfaqëson një hap konkret në mbrojtjen e trashëgimisë kulturore dhe në forcimin e kujtesës sonë historike. Xhamia e Orllanit, si një nga objektet më të vjetra të zonës, pas dekadash qëndrimi si rrënojë e luftës, më në fund do të marrë shkëlqimin që i takon, duke u shndërruar në një simbol të qëndresës dhe trashëgimisë së paprekshme të Llapit.