Lajm i keq për Shpejtim Bulliqin, Prokuroria nis hetimet ndaj tij

Prokuroria Themelore në Prishtinë ka nisur hetimet pas akuzave drejtuar kryetarit të Komunës së Podujevës, Shpejtim Bulliqi, se ka ndërhyrë në vendimet për ndërtime e rrënime në Llap, raporton Gazeta Sinjali.

Zëdhënësja e Prokurorisë Themelore në Prishtinë, Laureta Ulaj, tha për Sinjalin se do të merren masa konform dispozitave ligjore, nëse konfirmohen deklaratat e ish-drejtorit të Inspeksionit, Besnik Mulliqi se Bulliqi ka ndërhyrë në vendimet për ndërtimet në zonën e Orllanit.

“Referuar pyetjeve të parashtruara nga ana juaj, ju njoftojmë se Prokuroria është duke i shqyrtuar të gjitha pretendimet e dhëna në opinionin publik nga z. Mulliqi, si dhe do të veprojë konform dispozitave ligjore në fuqi”, thuhet në përgjigjen e Ulajt për Sinjalin.

Pasi Bulliqi e shkarkoi nga pozita e drejtorit të Inspekcionit, Besnik Mulliqin, ky i fundit ka reaguar me një sërë akuzash, duke e konsideruar një vendim skandaloz shkarkimin e tij.

Mulliqi përmes një postimi në rrjetin social Facebook, ka thënë se shkarkimi i tij erdhi pas një aksioni të rrënimeve në fshatin Orllan, saktësisht në zonën e liqenit të Batllavës.

Ai e ka pranuar që ka pasur mospajtime të thella me Bulliqin.