Ky është plani i Haradinajt për formimin e ushtrisë së Kosovës

Ndonëse me shumicë të brishtë, me 10 vota të deputetëve serbë, Qeveria e cila pritet të drejtohet nga Ramush Haradinaj dhe pret që nesër të marrë votëbesimin në Kuvend, synon ta bëjë Kosovën me ushtri.

Në dokumentin “Parime Programore të Qeverisë së Republikës së Kosovës 2017 – 2021”, të cilin e ka siguruar Kohavisioni, e të cilin deputetët e PANA-s e kanë dërguar bashkë me kërkesën për thirrjen e seancës së jashtëzakonshme për të shtunën pasdite, kur pritet që të votohet Qeveria thuhet se Qeveria e Kosovës do t’i marrë të gjitha masat e nevojshme që FAK të ndërtohet sipas standardeve të NATO-s.

“Ajo do t’i përshtatet vlerave dhe misionit të NATO-s”, thuhet në këtë dokument, përcjell Koha.net. “FAK do të modernizohet dhe të pajiset me mjete teknike moderne të nevojshme për një ushtri profesionale sipas standardeve të NATO-s”, thuhet më tej aty.

Themelimi i FAK-ut ka ngjallur kundërshtime të shumta nga Lista Serbe dhe nga Beogradi zyrtar nën varësinë direkte të së cilit është kjo parti në Kosovë.

Presidenti Hashim Thaçi ishte detyruar të zmbrapset nga ideja dhe përpjekja e tij që FAK-u të bëhet ,e ligj të posaçëm, e duke anashkaluar ndryshimet kushtetuese të cilat janë të nevojshme për t’i hapë rrugë themelimit të ushtrisë.