Ky është grupi kriminal që u arrestua në Prishtinë, dyshohen për 10 grabitje të armatosura  

Gazeta Sinjali pak më parë raportoi ekskluzivisht për arrestimin e grupit kriminal, të cilët dyshohet se janë përfshirë në së paku dhjetë raste të grabitjeve të armatosura. Të dyshuarit u kapën në Stacionin e Autobusëve në Prishtinë dhe tashmë ndodhen nën masën e ndalimit policor.

Burimet e Gazetës Sinjali brenda Prokurorisë kanë bërë me dije se katër të dyshuarit janë:

A. S. 34-vjeçar

F. M. 34-vjeçar

Xh. S. 41-vjeçar

F. M. 32-vjeçar

Sinjali mëson ekskluzivisht se S, M, S dhe M dyshohen për një sërë grabitjesh nën kërcënimin e armëve, kryesisht në pompa derivatesh në rajonin e Prishtinës, por edhe në shitore e vende tjera dhe të njëjtit ia kishin mësyrë që të largohen nga shteti i Kosovës.

Të dyshuarit janë arrestuar dhe janë shoqëruar në stacion policor, ku janë intervistuar lidhur me rastin nga organet e hetuesisë.

Ndërkohë Policia në koordinim me Prokurorinë ka kryer bastisje në pronat e të dyshuarve, ku kanë gjetur dhe sekuestruar disa prova materiale për rastet në të cilat dyshohet se janë përfshirë.

Pas përfundimit të procedurave policore, Prokurori i Shtetit ka nxjerrë aktvendim që të dërgohen në mbajtje dhe ata do të hetohen nën dyshimet për kryerjen e veprës penale ‘Grabitje’.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.