Kuvendi mbajti mbledhjen e rregullt dhe miratoi të gjitha pikat e rendit të ditës

Kuvendi i Komunës së Podujevës ka mbajtur sot mbledhjen e rregullt, të cilën e udhëhoqi Kryesuesi i Kuvendit, Isak Shabani. Në mbledhje ishte i pranishëm edhe Nënkryetari i Komunës, Fahri Restelica, drejtorë të drejtorive, përfaqësues nga KFOR-it, përfaqësues të OSBE-së dhe media.

Gjatë kësaj mbledhje, Kuvendi miratoi të gjitha pikat e rendit të ditës.

Fillimisht u miratua procesverbali nga mbledhja e mbajtur më 29 dhjetor 2025. Më pas, u diskutua dhe u miratua raporti përmbledhës i punës së Kuvendit të Komunës për vitin 2025.

Kuvendi po ashtu miratoi propozim-vendimin për formimin e Komisionit Ad-Hoc për hartimin e draft Planit të Punës së Kuvendit për vitin 2026 (Komisioni u miratua me një përbërje prej 11 anëtarësh nga të gjitha subjektet politike), dhe u miratua propozim-vendimi për themelimin dhe përbërjen e Komitetit për Komunitete (Përbërja e Komitetit u bë nga nëntë (9) anëtarë, 5 nga komuniteti jo shumicë dhe 4 nga anëtarët e Kuvendit.

Në këtë mbledhje u miratua edhe propozim-vendimi për ngritjen e komisionit për përzgjedhjen e drejtorëve dhe zëvendësdrejtorëve në institucionet publike edukativo-arsimore të Komunës së Podujevës.

Gjithashtu, Kuvendi komunal miratoi Listën e veçantë të pronave të paluajtshme të Komunës që planifikohen për dhënie në shfrytëzim gjatë vitit 2026.

Ndërsa në pikën “Të ndryshme” anëtarët e Kuvendit shtruan pyetje për ekzekutivin dhe diskutuan për çështje të ndryshme.