Kuvendi i Podujevës miraton planin e punës për vitin 2018

“I lodhtë” është quajtur plani i punës së Kuvendit Komunal të Podujevës nga zyrtarët e lëvizjes Vetëvendosje. Këshilltari i saj, Bajram Ajeti, ka thënë se ky plan nuk është i plotësuar dhe se nuk duhet të miratohet në këtë mënyrë.

Në mbledhjen kur po diskutohej për këtë pikë, Ajeti ka shtuar se në këtë dokument askund nuk figuron plotësimndryshimi i Statutit të Komunës, e që ishte pikë e rendit të ditës formimi i një komisioni që do të merrej me këtë punë, shkruan sot “Koha Ditore”.

“Duke e parë çka është propozuar në këtë plan të punës për vitin 2018, mendoj se është një plan jo i plotë, i lodhët dhe kopje nga vitet e mëhershme. Ne këtu nuk e kemi të paraparë planin e prokurimit, planin e auditimit që janë të parapara me ligj. Propozoj që të bëhet një komision nga partitë politike që ta bëjnë një plan të mirë dhe në mbledhjen tjetër të miratohet një plan i plotë”, ka thënë Bajram Ajeti.

Ndryshe mendonte shefi i Grupit të këshilltarëve të LDK-së, Avni Fetahu.

“Grupi i këshilltarëve të LDK-së e përkrah planin e punës së Kuvendit Komunal të Podujevës për vitin 2018, në të cilin parashihen punë të ndryshme nga Kuvendi dhe Ekzekutivi. Njëkohësisht gjatë vitit mundet që të plotësohet me pika të tjera varësisht prej nevojave. Në kuadër të këtij plani kërkojmë të futet edhe një informatë për shëndetësinë”, ka theksuar ai