Kush janë ish luftëtarët e UÇK-së në VV që i dolën kundër Shpejtim Bulliqit në Podujevë?

Është konfirmuar tashmë kundërkandidati i Shpejtim Bulliqit për të marrë frenat e qendrës së Vetëvendosjes në Llap. Emri i tij është Bedri Maçastena, ish drejtor i Inspeksionit, shkruan Nacionel.com, transmeton PodujevaPRESS.net

Maçastena ishte shkarkuar nga Bulliqi, siç ka nënkuptuar, për shkak se kishte luftuar “veprimet e pandershme dhe të paligjshme”.

Pas tij, u shkarkua edhe drejtori tjetër i Inspeksionit, Besnik Mulliqi. E para tij, ishte shkarkuar edhe drejtori i mëhershëm i Inspeksionit.

Pas tre drejtorëve të Inspeksionit, u largua me anë të dorëheqjes edhe drejtori i Shëndetësisë, Driton Veliu.

Në anën tjetër, dy asambleistë të Vetëvendosjes e kanë sharë qeverisjen e z. Bulliqi, çka ka shtyrë që ta bëjnë të njëjtën edhe simpatizantë të tjerë të kësaj partie politike.

Me kandidimin e Maçastenës, duket të jetë formuar tashmë edhe grupi kundër Bulliqit për t’ia marrë pushtetin lokal partiak në Podujevë.

Kush është Maçastena dhe kush janë të tjerët?

Bedri Maçastena është aktivist i Vetëvendosjes që më herët kishte qenë edhe luftëtar i Ushtrisë Çlirimtare të Kosovës (UÇK) në një moshë shumë të re, 17 e 18 vjeçare.

Tashmë 41 vjeçari e ka konfirmuar se do të jetë kandidat për t’u bërë kryetar i Vetëvendosjes në Podujevë.

Maçastena në përpjekjen e tij për të marrë frenat e tij në Llap, pritet të ketë mbështetjen e ish kandidatit të VV-së për kryetar të Podujevës, Ajet Poterës – një tjetër ish luftëtar i UÇK-së.

Ky i fundit – që ka qenë në vazhdimësi kritik ndaj Bulliqit – kishte pëlqyer statusin e botuar nga Maçastena në Facebook. Njëjtë kishte vepruar edhe Driton Veliu, ish drejtori i Shëndetësisë që dha dorëheqje nga pozita gjatë ditës së djeshme. Njëjtë kishte vepruar edhe ish drejtori tjetër i Inspekcionit, Besnik Bulliqi. E po ashtu, edhe asambleisti Florent Hasani.

Bulliqi

Shpejtim Bulliqi kishte lënë detyrën si kryetar i Komisionit që parashihej të korrigjonte demarkacionin e kufirit me Malin e Zi për t’u bërë kandidat për kryetar të Podujevës.

Ish anëtari i Lidhjes Demokratike (LDK), kishte arritur që ta mposhte ish partinë e tij përmes Vetëvendosjes për herë të parë në histori të zgjedhjeve lokale në Podujevë.

Në atë kohë, ishin zgjedhjet e parakohshme në Podujevë. Në zgjedhje të rregullta, ai kishte arritur që të fitonte me balotazh me një rezultat fare të ngushtë ndaj kandidatit të LDK-së, Ekrem Hyseni.

Për këtë fitore, ishte angazhuar shumë edhe kryeministri Albin Kurti por edhe aktivistët e pakënaqur – përfshirë ish luftëtarët e UÇK-së që tashmë i kanë dalë kundër Bulliqit.

Kujtojmë se në Podujevë kishte pasur vazhdimisht tensione politike gjatë viteve 2000 mes LDK-së së cilës i takonte Bulliqi dhe PDK-së së asokohshme që kishte në gjirin e saj shumë luftëtarë të UÇK-së. Sidoqoftë, përballja politike në Llap aktualisht duket shumë më ndryshe, me shumë akterë të tjerë të përfshirë.

Duhet theksuar se Vetëvendosje po mban zgjedhjet e brendshme partiake në të gjitha qendrat e saj.