Kurti shpërblen Podujevën: Rritet pesha e degës së VV-së në Qeverinë Kurti 3

Përfaqësimi i degës së Lëvizja Vetëvendosje në Podujevë në kuadër të Qeveria e Kosovës pritet të zgjerohet në përbërjen e re të Qeverisë Kurti 3.

Pas emërimit të Saranda Bogujevci dhe Ejup Maqedonci në pozita ministrore, burime brenda strukturave partiake bëjnë të ditur se nga dega e VV-së në Podujevë priten edhe emërime të tjera politike në nivel qendror.

Sipas informacioneve të siguruara, të paktën dy emra nga kjo degë pritet të emërohen në pozita të zëvendësministrave. Po ashtu, në pritje janë edhe disa emërime në poste të shefave të kabineteve dhe këshilltarëve politikë në ministri të ndryshme.

Nëse këto emërime konfirmohen, Podujeva do të ketë një përfaqësim të konsiderueshëm në strukturat ekzekutive të vendit, me dy ministra, dy zëvendësministra si dhe një numër të madh të këshilltarëve politikë.

Zyrtarizimi i këtyre emrimeve pritet të bëhet në ditët në vijim.