Kurti: Me ndihmën e SHBA-së e BE-së mund të arrijmë marrëveshje me Serbinë

Kryeministri i Kosovës, Albin Kurti, në një intervistë për CNN-in, ka thënë se është optimist se me ndihmën e SHBA-së e Bashkimit Evropian, mund të arrihet një marrëveshje për normalizim të marrëdhënies Kosovë – Serbi.

Kurti ka thënë se gjatë bisedimeve në Bruksel gjithmonë mundohet të jetë konstruktiv e kreativ, duke bërë propozime të ndryshme për zgjidhje.

“Shpresoj që Brukseli ta vlerësojë e përfundimisht në javët e muajt e ardhshëm t’i afrohemi marrëveshjes me qendër njohjen e ndërsjellë. Pavarësia e Kosovës po ashtu po konfirmohet nga shumica e shteteve në botë që na njohin, por edhe nga Gjykata Ndërkombëtare e Drejtësisë. Debati për ligjshmërinë e pavarësisë sonë ka mbaruar. Ajo që dueht rregulluar është marrëdhënia abnormale mes Kosovës e Serbisë. Serbia nuk është demokraci, ku njerëzit që nuk kanë marrë pjesë në mizoritë e 90-tave të mund ta udhëheqin. Ke kryeministren e Serbisë aty, por Serbia prapë është ‘one man sho]’. Presidenti është ai që vendos gati çdo gjë. Por jam optimist se me ndihmën e SHBA-së dhe BE-së mund të arrijmë një marrëveshje, pasi shumica e qytetarëve të Serbisë nuk shqetësohen për pavarësinë e Kosovës apo situatën në Kosovë. Ata duan punë, duan drejtësi, edukim, shëndetësi, si gjithë qytetarët e Ballkanit Perëndimor”, tha Kurti.

Kurti ka thënë se BE-ja do të mund të ndihmonte me shpejtimin e procesit të integrimit të gjashtë shteteve të Ballkanit Perëndimor.

Kryeministri i Kosovës ka thënë se ka lejuar vizitën në Kosovë të kryeministres së Serbisë, Ana Bërnabiq, për t’ia bërë të mundur asaj të shohë se Kosova është shtet normal, më demokratik se Serbia e më i pavarur.

“Pasi Serbia është e varur nga Rusia”, ka thënë Kurti.

Kurti ka thënë se Serbia ka 48 baza rreth Kosovës, 28 ushtarake e 20 të xhandarmërisë së Serbisë.

“Ministri i Mbrojtjes së Rusisë ka një seli brenda Ministrisë së Mbrojtjes së Serbisë”, ka thënë Kurti, duke shtuar se ka rreziqe për tensionim të situatës në Ballkan. “Serbia ka lidhje të ngushta me Kremlinin, në njërën anë kulturore e historike, e tjetrën ushtarake e ekonomike”.

Kurti ka thënë se nuk beson se do të ketë luftë, pasi Kosova ndonëse nuk është në NATO, NATO është brenda saj. Por, ka thënë se nuk duhet marrë të garantuar.

“Po e forcojmë sistemin tonë të mbrojtje, duke ndarë më tepër buxhet për FSK-në, po forcojmë Policinë tonë, e po ashtu bashkëpunimin me aleatët e NATO-s, veçanërisht me SHBA-në. Mendoj se jemi të sigurt, por nuk do të thotë se nuk duhet shqetësuar”, ka thënë Kurti.

Kurti ka folur edhe për tensionet e shkaktuara në veri të Kosovës në natën para se të hynte në fuqi reciprociteti i dokumenteve hyrje/dalje. Marrëveshja për letërnjoftime mes dy vendeve u arrit në Bruksel në gusht. Në diskutime është edhe çështja e targave.

“Sa i përket targave por edhe gjërave tjera, do të vazhdojmë me parimin e reciprocitetit. Do të ketë nga dy anët prezantimin e të njëjtës gjë apo në asnjërën. Preferoj që asnjërën. Pasi në këtë mënyrë do të lehtësojmë lëvizjen e qytetarëve”, tha Kurti.

Kurti është pyetur edhe për rrezikun e krijimit të një Republika Sërpska brenda Kosovës. Kurti thotë se po të mos kishte qenë përkrahja e Beogradit, serbët në Bosnjë-Hercegovinë, Mal të Zi e Kosovës do të integroheshin.

“Por është Beogradi që po paguan njerëzit në gjithë këto shtete, për të sabotuar funksionalitetin e këtyre shteteve. Duhet të ketë më tepër presion ndërkombëtar ndaj Beogradit që të hiqet dorë nga këto veprime. Sikur Moska që ka bërë këto gjëra te fqinjët e saj, pas shpërbërjes së Jugosllavisë, ishte Beogradi që u mundua të krijojë etnitete autonome në shtete tjera për t’i kontrolluar ato. Ka ndodhur në Bosnjë, me krijimin e Republika Sërpskas gjenocidale, që e ka kthyer Bosnjën në një shtet jofunksional. Në Kosovë nuk po lejojmë të ndodh e njëjta gjë, ndonëse Beogradi do të donte këtë. Gjithmonë jam i gatshëm të dëgjoj dhe respektoj të drejtat e të gjitha minoriteteve në Kosovë”, tha Kurti.