Kurti: I thamë Macron-it se propozimi franko-gjerman është bazë e mirë

Për Albin Kurtin propozimi franko-gjerman për marrëveshje me Serbinë është “bazë e mirë”.

Këtë mendim të tij për draftin e projektuar nga këshilltarët Emmanuel Bonne dhe Jens Plotner, ia ka thënë edhe presidentit francez, Emmanuel Macron, në një takim në Paris, bashkë edhe me presidenten e Kosovës, Vjosa Osmani.

“Potencuam se Kosova ka propozuar kornizën e përgjithshme të marrëveshjes, ndërsa propozimi franko-gjerman shërben si bazë e mirë për diskutime të mëtejshme”, shkruan Kurti t’i ketë kumtuar në takim Macron-it.

Kurti e Osmani takuan Macron-in në Pallatin Elysee, në vigjilje të Forumit për Paqe që mbahet në kryeqytetin francez me 11 dhe 12 nëntor.

“Në takimin e përbashkët me Presidenten Osmani, biseduam për thellimin e marrëdhënieve bilaterale në mes të dy shteteve, dialogun për marrëveshje Kosovë-Serbi, si dhe zhvillimet e fundit”, shkruan në Facebook Kurti.

Ai gjithashtu ka sqaruar se në këtë takim është theksuar edhe se “Republika e Kosovës është partnere e besueshme e Republikës së Francës dhe aleatëve të tjerë euroatlantik”.

“Falënderuam Presidentin Macron për angazhimin e Francës, në bashkëpunim me Gjermaninë, për dinamizimin e procesit të dialogut dhe ritheksuam përkushtimin e plotë të Republikës së Kosovës në këtë proces, të bazuar në ruajtjen e rendit kushtetues, sovranitetit, integritetit territorial e marrëdhënieve të mira fqinjësore”.

Të mërkurën, Kurti gjatë një konference për media kur ka folur për propozimin franko-gjerman, ka theksuar se “qëllimi i Beogradit nuk është për të mos pranuar planin, por qëllimi i tyre është për ta maskuar refuzimin e planit dhe tash i bëjnë këto drama që nuk duhet të shndërrohen në tragjedi”.

“Këshilltaret e lartë të Scholz dhe Macron së bashku edhe me ndërmjetësuesin Lajçak kanë sjellë përmbledhje të ideve të modeleve të cilat unë nuk i kam refuzuar, por kam thënë që janë bazë e mirë, unë i kam vërejtjet e mia, jua kam thënë edhe atyre, mirëpo unë nuk e kam refuzuar”, theksoi Kurti.

Ndërsa shefi i diplomacisë evropiane, Josep Borell, ka pohuar se Bashkimi Evropian ka marrë përgjigje për propozimin franko-gjerman nga kryeministri i Kosovës, Albin Kurti dhe presidenti i Serbisë, Aleksandër Vuçiç.

“Kemi marrë përgjigje nga të dyja palët. Ne jemi duke i studiuar ato”, ka thënë Borell.

“Shpresoj se ai (propozimi) do të përfaqësojë një ndryshim dhe një hap përpara në këtë proces”, shtoi ai në prag të takimit të ministrave të jashtëm të G7 në Munster, transmeton Shërbimi i Jashtëm Evropian (EEAS).

Çka thuhet në propozimin franko-gjerman?

Në propozimin franko-gjerman thuhet se në vitin 2023 duhet të nënshkruhet marrëveshja e dytë për normalizim të marrëdhënieve, pas asaj të vitit 2013, me të cilën Serbia faktikisht e pranon realitetin e Kosovës shtet të pavarur, por nuk e njeh formalisht.

Në një fazë të mëvonshme, hipotetikisht pas 10 vitesh, atëherë kur BE-ja është e gatshme të zgjerohet dhe ta përfshijë Ballkanin perëndimor, arrihet marrëveshja për njohje të ndërsjellë, si parakusht i të dy shteteve për anëtarësim në BE.

Ky është plani i paraqitur në kornizën e re për marrëveshje në mes të Kosovës e Serbisë, i përpiluar pas angazhimit të këshilltarëve të presidentit Emmanuel Macron dhe kancelarit Olaf Scholz, të cilin e ka siguruar Albanian Post.

Me marrëveshjen e vitit të ardhshëm (nëse pranohet propozimi) Kosovën e pranojnë edhe pesë shtetet që akoma nuk e kanë njohur të Bashkimit Evropian, kurse Serbia do të përfitojë një ndihmë masive financiare, asistencë ekonomike dhe do njihet si fuqia e rajonit.