Kundër Korrupsioni konstaton shkelje ligjore në një tender të Komunës së Podujevës

Zyrtarët e Agjencisë Kundër Korrupsionit kanë konstatuar shkelje ligjore në tenderin e Komunës së Podujevës për “Furnizim me material higjienik”. Në opinionin që e ka publikuar ky institucion, thuhet se Komuna si autoritet kontraktues ka bërë specifikime teknike të artikujve, që është në kundërshtim me Ligjin për prokurim publik. AKK-ja ka kërkuar nga zyrtarët komunalë që t’i evitojnë këto shkelje.

“Agjencia pasi ka analizuar me kujdes njoftimin për kontratë, dosjen e tenderit dhe specifikimet teknike, vëren se tek Aneksi 1, Autoriteti Kontraktues ka emërtuar artikujt si në vijim: artikulli nr.12 Vim 500gr, artikulli nr.14 Varakin, artikulli nr.15 Domestos, artikulli nr.23 Shampon për tavolina (politura), artikulli nr.42 Vim i lëngët dhe artikulli nr.51 Avaks për banjë, artikuj të cilët janë specifikuar nga njësia kërkuese në atë mënyrë që u përshtatën prodhuesve të caktuar dhe eliminojnë prodhuesit e tjerë”, thuhet në arsyetimin e këtij opinioni të Kundër Korrupsionit. “Veprimet e Autoritetit Kontraktues konsiderojmë se bien ndesh me nenin 7 Barazia në Trajtim/Jo-diskriminim nenin 27 Dosja e Tenderit, nenin 28 Specifikimet teknike të Ligjit për prokurimin publik….si dhe nenin 20 të Rregullave dhe Udhëzuesit Operativ për Prokurimin Publik, shkruan sot KOHA Ditore.

I njëjti autoritet konsideron se autoriteti kontraktues më konkretisht njësia kërkuese duhet të ketë kujdes dhe t’i përpilojë specifikimet teknike në atë mënyrë që të jenë të hapura për të gjithë operatorët ekonomikë, të cilët mund të bëjnë furnizimet e tilla.

Sipas AKK-së, autoriteti kontraktues e ka të ndaluar që të hartojë specifikime teknike që favorizojnë ose diskriminojnë një ose më shumë operatorë ekonomikë apo prodhues të caktuar në treg.