Kryetari i Podujevës kërkon nga MSH-ja lehtësira në rekrutimin e stafit mjekësor

Kryetari i Komunës së Podujevës, Shpejtim Bulliqi, ka kërkuar nga ministri i Shëndetësisë, Rifat Latifi, lehtësira në rekrutimin e stafit shëndetësor.

Sipas Bulliqit, me numrin e punonjësve shëndetësorë që aktualisht janë në këtë qytet, është e pamundur të ofrohen shërbime cilësore. Këto komente ai i ka bërë pas një takimi që ka pasur me ministrin Latifi, sekretarin e MSH-së, Naim Bardiqi dhe drejtorin e SHSKUK-së, Valbon Krasniqi.

Sipas njoftimit të Zyrës për Informim të Komunës së Podujevës, gjatë këtij takimi Bulliqi ka kërkuar mbështetjen e Ministrisë së Shëndetësisë në realizimin e projekteve, të cilat ndikojnë në ngritjen e cilësisë së shërbimeve shëndetësore.

“Në fokus të takimit tonë ishte diskutimi për projektin e ndërtimit të Qendrës Urgjente në Podujevë, ku për fillimin e tij ditë më parë kemi nënshkruar një marrëveshje bashkëfinancimi me ‘Qatar Charity’ dhe kërkuam që edhe Ministria e Shëndetësisë të përfshihet në bashkëfinancim”, ka thënë Bulliqi. “Kërkova eliminimin e pengesave për rekrutim dhe krijimin e mundësive për rritje të stafit shëndetësor, sepse me numrin aktual është e pamundur të ofrohen shërbime cilësore dhe sipas nevojave të qytetarëve llapjanë”.

Kryetari Bulliqi ka thënë se ka kërkuar ndihmën e instancave qendrore të shëndetësisë edhe për funksionalizimin e objektit të ndërtuar afër shkollës “Enver Maloku” në mënyrë që të fillohet me ofrimin e shërbimeve specialistike për pacientët llapjanë.

“Edhe ministri Latifi u zotua se Ministria e Shëndetësisë dhe ShSKUK-ja brenda mundësive do ta ndihmojnë Komunën e Podujevës në realizimin e këtyre kërkesave, si dhe për projektet tjera të rëndësishme për komunën”, thuhet tutje në këtë njoftim.