Kryetari Bulliqi përcjell nga afër fushatën e korrje-shirjeve në Podujevë

Kryetari i Komunës së Podujevës, Shpejtim Bulliqi, së bashku me drejtoreshën për Bujqësi, Pylltari dhe Zhvillim Rural, Lirie Hoti, kanë përcjell nga afër fushatën e korrje-shirjeve në territorin e komunës. Ata vizituan fermerin Bujar Osmani në fshatin Balloc, i cili këtë vit ka të mbjellur 6 hektarë me grurë, njofton portali PodujevaPRESS.net.

Kryetari Bulliqi përgëzoi fermerin Osmani për përkushtimin dhe punën e tij të palodhur, duke uruar që fushata e korrje-shirjeve të zhvillohet me sukses dhe fermerët të arrijnë rendimente të kënaqshme. Ai theksoi se Komuna do të vazhdojë të jetë pranë fermerëve, duke i mbështetur përmes politikave lokale dhe subvencioneve në sektorin e bujqësisë, të cilin e vlerësoi si një nga shtyllat kryesore të zhvillimit ekonomik lokal.

Sipas të dhënave nga Drejtoria për Bujqësi, deri më tani në Podujevë janë korrur mbi 4 mijë hektarë me grurë dhe 25 hektarë me elb. Rendimentet e këtij viti për grurin sillen nga 4500 deri në 5000 kilogramë për hektar, ndërsa për elbin rreth 3500 kilogramë për hektar.