Kryetari Bulliqi inspektoi punimet në fushën sportive në fshatin Gllamnik

Kryetari i komunës së Podujevës, Shpejtim Bulliqi, bashkë me drejtorin e drejtorisë së Kulturës, Rinisë dhe Sportit, Pajtim Balaj dhe me shefen e kabinetit, Edonë Çitaku, vizituan punimet në fushën e futbollit në Gllamnik, të cilat kishin mbetur për shkaqe objektive të pakryera që nga viti 2020, njofton zyra për informim, transmeton PodujevaPRESS.net

Fusha tani është e gatshme për shfrytëzim të komunitetit dhe në të mund të zhvillohen ndeshje në Basketboll dhe në Futboll të vogël.

Kryetari Bulliqi gjatë vizitës tha “Me kontratën aktuale, pritet të kryhen punimet për funksionalizimin edhe të fushave të tjera, të cilat për të njëjtat shkaqe kanë mbetur në gjysmë tash e dy vite. Si qeverisje komunale ne jemi shumë të përkushtuar në krijimin e kushteve për zhvillimin e jetës kulturore dhe sportive në të gjithë territorin e Komunës së Podujevës”.

Për fund kryetari Bulliqi i uroi banorët e fshatit Gllamnik dhe fshatrave përreth për realizimin e këtij projekti.