“Kosova do ta ketë qeverinë e re në fund të muajit maj, ose në fillim të qershorit”

Njohësi i çështjeve politike, Naim Rashiti, ka parashikuar se formimi i qeverisë së re do të bëhet në fund të muajit maj, apo në fillim të qershorit.

Në një intervistë për televizionin publik, Rashiti ka theksuar se qeveria e re pritet të bëhet në bashkëpunim mes LDK-së, AAK-së, Nismën, AKR-në dhe minoritetet.

“Mendoj që Kosova do ta ketë qeverinë e re në fund të muajit maj, ose në fillim të muajit qershor”, ka thënë Rashiti.

Në anën tjetër, presidenti Thaçi ia ka shkruar letrën e tretë kryeministrit në detyrë, njëherit kreut të Vetëvendosjes, Albin Kurti, duke ia kërkuar emrin e mandatarit të ri për formimin e qeverisë.

Po ashtu, Thaçi ka takuar sot edhe ambasadorët e QUINT-it, të cilëve iu ka thënë se vendit i duhet një qeveri e re dhe me mandat të plotë nga Kuvendi i Republikës.

Mirëpo, nënkryetarja e VV-së, Arbërie Nagavci, ka theksuar se partia e Kurtit nuk e ka ndërmend që ta propozojë emrin pa përfunduar pandemia e koronavirusit. Ajo ka theksuar se vendi duhet të shkojë në zgjedhje të jashtëzakonshme, me të përfunduar pandemia.