Koronavirusi hyn në Kuvend, testohen 50 deputetë dhe zyrtarët e administratës

Infektimi me koronavirus i së paku dy deputetëve dhe tre zyrtarëve të lartë të administratës së Kuvendit ka shkaktuar gjendje pasigurie për të punuar brenda këtij institucioni.

Për rrjedhojë, siç mëson AktivPress nga burimet e veta, sot në Kuvend janë kryer një sërë testimesh për Covid-19 nga IKSHPK-ja.

Në listën prej 50 vetash të cilën e ka parë gazeta, figurojnë emra deputetësh dhe të stafit të administratës.

Në grupin e deputetëve bëjnë pjesë 30 veta, ndërsa nga administrata 20.

Deputetët që janë futur në listë për testim vijnë thuajse nga të gjitha grupet parlamentare.

Në fakt kjo është hera e dytë gjatë kësaj jave që bëhen testime në Kuvend.

Të hënën kanë i kryer testet 51 veta, që i bie që brenda katër ditëve në Kuvend janë testuar hiq më pak se 101 persona.

Rasti i parë i konfirmuar me Covid-19 brenda Kuvendit ka qenë ai i shefit të GP të LDK-së, Arben Gashi.

Më pas, pozitiv me covid kanë rezultuar edhe Sekretari i Kuvendit, Ismet Krasniqi dhe Drejtori i përgjithshëm për çështje ligjore, Xheladin Hoxha.

Këto raste, shtuar dy të fundit, kanë shtyrë Kuvendin që të kërkojë nga IKSHPK-ja testime në masë më të madhe.

Me masat e reja që janë aprovuar nga Qeveria, siç shkruan AktivPress, parashihet mbyllja e zyrave apo njësive në të gjitha institucionet publike dhe bizneset private ku ka raste pozitive.

Kryetarja e Kuvendit, Vjosa Osmani, ditë më parë ka reaguar duke thënë se rritja e konsiderueshme e rasteve me Covid-19, kërkon vëmendjen urgjente të Qeverisë dhe përkushtimin e të gjithëve në respektimin e udhëzimeve.

Aktualisht numri total i përgjithshëm i rasteve pozitive me Covid-19 në Kosovë është 2.991.

Kontaktet me rastet pozitive duhet të vet-izolohen për 14 ditë në shtëpi dhe nuk duhet të kenë asnjë kontakt gjatë kësaj periudhe.

Të gjitha rastet pozitive dhe kontaktet e tyre, mbikëqyren nga shtabet Komunale, kontrollohen nga inspektorati, QKMF dhe organet e rendit.