Kontratat e “dyshimta” në komunën e Podujevës

Opozita dhe shoqëria civile në Podujevë kanë hedhur dyshime për dy kontrata që ka nënshkruar komuna për ndërtimin e dy rrugëve. Projekti për ndërtimin e rrugëve “Xhemajl Mustafa” dhe “Skënderbeu” ka rënë nën llupën e opozitës dhe të shoqërisë civile, sipas së cilave, komuna nuk ka respektuar procedurat. Por, këto pretendime janë hedhur poshtë nga zyrtarët komunalë.

Në Podujevë janë hedhur dyshime se me nënshkrimin e dy kontratave nga komuna, janë bërë shkelje ligjore.

Projekti për ndërtimin e rrugëve “Xhemajl Mustafa” dhe “Skënderbeu” ka rënë nën llupën e opozitës dhe të shoqërisë civile, sipas së cilave, komuna nuk ka respektuar procedurat.

Sipas këtyre kontratave, Komuna e Podujevës ka ekzekutuar 171 mijë euro për rrugën “Xhemajl Mustafa” për të cilën ende as nuk kanë nisur punimet.

Derisa, për rrugën “Skënderbeu”, që ka kushtuar 1 milionë e 300 mijë euro, ka nënshkruar një kontratë të re, për punë shtesë, derisa aty nuk specifikohen detaje.

Ligji i Prokurimit Publik parasheh që një kontratë e re, pas kontratës fillestare mund të bëhet vetëm prej dy viteve pas përfundimit të kontratës së parë, derisa projekti i rrugës “Skënderbeu”nuk i ka përmbushur ende dy vite që është në realizim.

Opozita ka kërkuar sqarime nga Komuna e Podujevës, me pretendimet se në këto dy kontrata ka shkelje ligjore.

Edhe nga shoqëria civile i kanë cilësuar si shkelje të rënda procedurat që janë ndjekur në këto dy kontrata.

Por, drejtori i Financave në Podujevë, Fatlum Osmani, ka mohuar këto akuza, duke thënë se të gjitha procedurat kanë shkuar sipas ligjit.

Ai ka thënë se për të dy rrugët është bërë një projekt, megjithëse në kontratë nuk përmendet një gjë e tillë dhe që për njërën rrugë janë ndarë mjetet shtesë.

Osmani e ka arsyetuar edhe pagesën prej 171 mijë eurosh për rrugën “Xhemajl Mustafa”, edhe pse punimet nuk kanë nisur ende.

Sa i përket rrugës “Skënderbeu” dhe ndarjes së mjeteve shtesë prej 98 mijë eurosh, Osmani e quan si aneks kontratë, megjithëse në dokumente figuron si kontratë.

Këto dy rrugë janë paraparë të përfundojnë në vitin 2024.