Konjufca i bashkohet presidentes Osmani: “Kosova nuk e ka më prioritet dialogun me Serbinë”

Çdo ditë e më shumë po shtohen zërat që Kosova nuk duhet të shkojë në dialog me Serbinë, pas sulmit terrorist në Banjskë të Zveçanit. Pas presidentes, Vjosa Osmani, kryediplomatës Donika Gërvalla, tash edhe kryekuvendari i Kosovës, Galuk Konjufca po rreshtohet në krahun që dialogu nuk është prioritet. Gjithashtu edhe vartës të tjerë të pushtetit e kërkojnë këtë gjë.

Sulmi terrorist në Banjskë ka ndryshuar edhe qasjen e politikanëve kosovar karshi dialogut me Serbinë.

Presidentja e vendit, Vjosa Osmani ishte e para që në njëfarë forme kundërshtoi rikthimin në dialogu pas sanksionim të Serbisë.

“Nuk ka arsye për tu takuar para se të vendosen sanksione kundër (Aleksandar) Vucic-it, sanksionet fillimisht e më pas mund të diskutojmë për të tjerat.” – ka thënë Osmani gjatë samitit në Granada të Spanjës që u mbajtë javën e kaluar.

Ajo kishte thënë se do të kërkojë vendosjen e sanksioneve ndaj Serbisë, ngjajshëm po kërkon edhe kryeministri, Albin Kurti.

“Jam këtu për të kërkuar mbështetjen e partnerëve dhe miqve evropian për ta sanksionuar Serbinë në mënyrë që ajo të mos nxitet për të kryer akte të tilla agresioni kundër Kosovës dhe vendeve të tjera fqinje sërish.” – ka thënë Osmani.

Në ndërkohë, kësaj qasje i është bashkuar edhe kryetari i Kuvendit të Kosovës, Glauk Konjufca, i cili ka thënë se për Kosovën nuk është prioritet më dialogu.

Ai ka thënë se procesi politik është në rend të tretë ndërsa, në rend të parë është çështja e sigurisë së Kosovës.

“Tash procesi politik është në rend të tretë, në rend të parë është çështja e sigurisë së Kosovës. Unë mendoj që sot Policia e Kosovës nuk është duke menduar për Asociacionin, është duke menduar se si ta shmang një sulm të ardhshëm nga shteti serb që mund të vij.” – ka thënë Konjufca në RTK nga Gjermania ku po qëndron për vizitë zyrtare atje.

Ndërkohë edhe Ministrja e Jashtme e Kosovës, Donika Gërvalla ka kërkuar nga Bashkimi Evropian (BE) që t’ia ngrijë Serbisë statusin e vendit kandidat.

Ditë më parë ajo ka thënë se tashmë nuk është koha që të ketë bisedime me Serbinë dhe të diskutohet për themelimin e Asociacionit.

“Në këtë situatë që është krijuar pas 24 shtatorit asgjë nuk mund të vijojë me avazin e vjetër. Është e pamundur sepse ne duhet të sigurojmë sigurinë e qytetarëve. Duhet të shohim si do të sillet bashkësia ndërkombëtare në raport me Serbinë. A do ta marrë përgjigjen e merituar për agresion apo jo. Pastaj mund të vijë koha e të ulemi e të diskutojmë me qetësi. Nuk është momenti të diskutojmë sot për asociacion.” – ka thënë Gërvalla.

Në anën tjetër, vendet evropiane e Amerika, kanë kërkuar nga Kosova dhe Serbia që të rikthehen në dialog.

BE-ja ka thënë se rruga e vetme për Kosovën dhe Serbinë është dialogu.

“Sa i përket dialogut, nuk ka asnjë rrugë tjetër, pos kthimit në dialog. Rruga drejt BE-së për Kosovën e Serbinë shkon pashmangshëm nëpërmjet dialogut të ndërmjetësuar nga BE-ja, s’ka rrugë tjetër.” – ka deklaruar të martën zëdhënësi i BE-së, Peter Stano.

Kujtojmë se kjo gjendje e krijuar me dialogun është për pasojë e sulmit terrorist serb në Banjskë të Zveçanit.

Nga ky sulm më 24 shtator mbeti i vrarë rreshteri i Policisë së Kosovës tashmë heroi Afrim Bunjaku.

Përgjegjësinë e këtij sulmi e ka marrë kryekrimineli dhe ish-nënkryetari i Listës Serbe, Milan Radojiçiq.