Konfirmohet takimi i Haradinajt me Thaçin, seanca për demarkacionin nesër në ora 16:00

Në orët e para të mëngjesit të sotëm, Kryeministri Ramush Haradinaj është takuar me Presidentin Hashim Thaçi, për t’u koordinuar për veprimet e tyre karshi çështjes së demarkacionit të kufirit ndërmjet Kosovës dhe Malit të Zi.

Lajmin e ka konfirmuar për “Gazeta Blic”, shefi i zyrës për informim në Qeverinë e Kosovës, Halil Matoshi. Sipas tij, në këtë takim janë diskutuar edhe tema të tjera.

“Po takimi ka ndodhur do të thotë dhe janë diskutuar të gjitha temat që lidershipi i Kosovës i ka para vetës”, tha ai.

“Seanca mbahet nesër dhe sipas versionit të qeverisë demarkacioni duhet të kalojë”, u shpreh Maotshi.

Ndryshe, Kryesia e Kuvendit ka caktuar vazhdimin e seancës për demarkacion për nesër në orën 16:00.

A do të arrihen 80 vota?

Për ratifikimin e marrëveshjes së demarkacionit nevojiten 80 vota, nga 120 deputetë që ka Parlamenti i Kosovës. Por tash për tash akoma është e paqartë nëse koalicioni qeverisës që mbështetet edhe nga Lidhja Demokratike e Kosovës, i ka 80 votat e nevojshme. 79 vota koalicioni qeverisës dhe LDK  thuhet t’i kenë siguruar, pasi një deputete e lëvizjes Vetëvendosje, Donika Kadaj-Bujupi,  iu bashkua AAK-së së kryeministrit Haradinaj. Por, mbetet të shihet deri të martën nëse është arritur të sigurohet edhe një votë për ta arritur numrin e nevojshëm prej 80 votave që të kalojë demarkacioni. Lëvizja Vetëvendosja dhe lista Srpska, deri tash janë deklaruar kundër marrëveshjes.

Lëvizja Vetëvendosja pretendon se Kosova me këtë marrëveshje aktuale humb territor. Vetëvendosja kërkon që “fillimisht të korrigjohen gabimet e bëra në shënjimin e kufirit me Malin e Zi e pastaj të ratifikohet marrëveshja”.

Ndërsa për listën Srpska, “me e rëndësishme është që të formohet asociacioni i komunave me shumicë serbe, sesa ratifikimi i demarkacionit me Malin e Zi”.

“Për Listën Serbe prioritet është formimi i Asociacionit të Komunave serbe (AKS) në Kosovë, e jo çështja e demarkacionit të Kosovës me Malin e Zi. Demarkacioni është me rëndësi për shqiptarët e Kosovës, por për serbët në Kosovë shumë më i rëndësishëm është formimi i AKS-së dhe avancimi i pozitës së serbëve në Kosovë”, thotë Igor Simiq nga grupi parlamentar  Srpska.

Zyra e BE-së në Prishtinë, ndërkaq, e ka mirëpritur marrëveshjen e dy presidentëve të Kosovës dhe Malit të Zi, që mundësoi  që demarkacioni të procedohet në kuvendin e Kosovës.

“Po presim që suksesshëm dhe shpejt të ratifikohet marrëveshja e diskutuar gjatë në demarkimin me Malin e Zi që do t’i sjellë qytetarëve të Kosovës të gëzojnë mundësinë për lëvizje të lirë”, është shprehur  shefja e zyrës së BE-së në Kosovë, Natalya Apostolova. /Gazeta Blic/