Komunitetet joshumicë në Podujevë ankohen për kushtet e rënda të jetesës

Punësim e ujë të pijshëm janë duke kërkuar komunitetet joshumicë të një lagjeje të Komunës së Podujevës. Ata thonë se numri i të punësuarve nga këto komunitete është simbolik, ndërkohë që cekin se mundësitë i kanë të kufizuara.

Punësimi dhe uji i pijshëm po i preokupon më së shumti komunitetet joshumicë që jetojnë në rrugën “Ulqini”, në Komunën e Podujevës.

Ata thonë se në pamundësi për t’u punësuar, e vetmja “zgjidhje” që u mbetet është mbledhja e kanoçe rrugëve e kontejnerëve, si dhe ndonjë punë sezonale në bujqësi.

E, pjesën tjetër të vitit, si tregojnë, mundohen ta përmbyllin me asistencë sociale.

“Telashet që i kanë komuniteti, sidomos te ne në Komunën e Podujevës, është punësimi. Punësimi është për të rinj të cilët për momentin nuk janë të punësuar. Kjo është një telash i madh, sepse shumica dalin nëpër rrugë mbledhin kanoçe, hekurishte edhe këto. Edhe janë punëtorë sezonalë, të cilët punojnë në bujqësi në momentin kur kërkohet”, ka thënë kryesuesi i Komitetit për Komunitete, Xhafer Ademi.

Ata thonë se numri i të punësuarve nga këto komunitete, si në sektorin publik, ashtu edhe privat, është simbolik, tek flasin për telashet me të cilat përballen.

“Këtu e kemi problemin me ujë. Na ka premtuar Qeveria e Kuvendit Komunal e Podujevës që do ta zgjidhë problemin me ujë të pijshëm. Këtu komuniteti jeton 80 për qind me ndihma sociale. E për ta blerë një kovë ujë kushton 1 euro e gjysmë. As nuk është kurrkush për ta paguar rrymën, as nuk është për ta paguar ujin, as nuk është për ta paguar bërllokun e lëre më ujin e pijshëm”, ka thënë Rrahman Ajeti, ashkali.

“Të hysh në krejt lagjen për ta parë, gjendjen më të vështirë e kam unë, jam edhe i sëmurë. Tash është problemi tjetër, kjo që më bren më së shumti, djalin e madh e kam 18-vjeçar. Ai e ka kryer shkollën e mesme të trafikut, kurse ky i dyti tash nuk po më shkon në shkollë. Ka filluar mësimi, tash grevën që e kanë pasur këta, por prej që ka filluar mësimi, djali nuk në shkollë, nuk po më shkon se nuk ka çka për të mbathur”, ka thënë Fitim Ademi, ashkali.

“Duhet të përmirësohet gjendja dhe të preken shtresat që janë të varfra, shtresat pa burime, shtresat pa të ardhura. Me një asistencë sociale nuk mund të jetohet në këtë inflacion, që jemi në këtë gjendje. Pra, patjetër duhet për të dalë edhe për të mbledhë kanoçe edhe t’i bëjmë të gjitha punët që janë fizike për të mundur të mbijetojmë si një familje”, ka thënë Agim Hyseni nga Organizata Joqeveritare “Shpresa Demokratike”.

Zyrtarët komunalë të Podujevës thonë se si institucione lokale janë të interesuara t’u dalin në ndihmë komuniteteve me pako ushqimore, por edhe me investime në infrastrukturë, në lagjet ku ata jetojnë.

“Meqenëse ata nuk mund t’i favorizojmë apo diskriminojmë në ndonjë konkurs, ata duhet t’i plotësojnë kriteret e parapara sipas ligjeve në fuqi të rekrutimit të stafit. Dhe në rastin e fundit kur ne kemi mundur që t’i punësojmë disa prej tyre ka qenë përmes Drejtorisë Komunale të Arsimit, ku fëmijëve të komuniteteve pakicë u është ofruar mësim shtesë e mësimdhënësit kanë qenë nga ky komunitet”, thuhet në përgjigjen e komunës.

Kryesuesi i Komitetit për Komunitete, Xhafer Ademi, ka thënë se nga 950 banorët e komuniteteve pakicë që jetojnë në Komunën e Podujevës, 2 familje janë egjiptiane, 10 rome, kurse të tjerët i përkasin komunitetit ashkali./KOHA net/N.Toverlani/