Komunës së Podujevës i teprojnë rreth 1 milion euro

Rreth 1 milion euro mjete i kanë “tepruar” Komunës së Podujevës gjatë vitit 2019.

Përveç tyre, opozita thotë se edhe një milion euro të tjerë Komuna nuk i ka arsyetuar.

Ata kanë thënë se nuk dihet se ku kanë shkuar këto mjete, pasi në raportin financiar për vitin e kaluar, i cili është publikuar para pak kohësh, janë shënuar me kode të përgjithësuara.

Zyrtarët e dy partive opozitare kanë akuzuar komunarët e Podujevës edhe për kurdisje të tenderëve e për shpërdorim të parasë publike për fushatë zgjedhore, raporton KOHA.

“Ne si këshilltarë komunalë i kemi bërë së paku 15 pyetje për raportin financiar e që për neve një shumë mbi 1 milion euro ka qenë e paarsyetuar. Kemi pasur p.sh. shërbime kontraktuese dhe të tjera, nuk kemi informata se për çfarë shërbimesh bëhet fjalë, kemi pajisje të tjera, kemi souftuer, akomodim, kemi mirëmbajtje rutinore e shumë elemente të tjera në kuadër të raportit që për neve ka qenë jotransparent, i paqartë dhe i paarsyeshëm për neve si këshilltarë komunalë e lëre më për qytetarët e vendit”, ka thënë Avni Fetahu, këshilltar komunal i Vetëvendosjes.

“Zakonisht si sfidë e këtij raporti është suficiti buxhetor, i cili na përsëritet vit pas viti. Por, kemi edhe vërejtje të tjera ku mbi 1 milion euro janë të paarsyetuara mirë, ku nuk ka kode, ku vetëm janë të përgjithësuara ato kode dhe si sfidë tjetër që ne e kemi cekur edhe në Kuvendin Komunal janë mbi 200 mijë euro që janë bërë shpenzime në gjykata. Ato janë shpenzime të dhunshme që Komuna ia ka paguar gjykatës”, ka thënë ndërkaq Avni Fetahu, po ashtu këshilltar komunal i Vetëvendosjes.

Zëdhënësi i Komunës së Podujevës, Nazmi Elezi, nëpërmjet një përgjigjeje me shkrim, ka thënë se janë 908 mijë e 772 euro që kanë mbetur suficit nga viti i kaluar, por ai nuk ka treguar nëse ka pasur mjete që i janë kthyer thesarit të shtetit për shkak të mosshpenzimit të tyre brenda vitit kalendarik.

Sipas tij, disa nga mjetet që janë burim i të hyrave vetjake të Komunës janë bartur nëpër projekte të ndryshme që pritet të realizohen këtë vit.