Komunës së Podujevës i kërkohet ta publikojë listën e pronave komunale

Partia opozitare në Podujevë, LDK ka kërkuar nga ekzekutivi komunal që ta publikojë në uebfaqe zyrtare listën e përgjithshme të pronave komunale dhe gjendjen e tyre.

Donjetë Sheqiri nga kjo parti, e cila e ka kritikuar Drejtorinë për Pronë, Kadastër dhe Gjeodezi për informatën e punës njëvjeçare, ka pyetur se kur do të publikohet kjo listë.

“Ky raport nuk i përmbush as kriteret minimale për t’u quajtur raport. Për të paraqitur punën njëvjeçare të kësaj Drejtorie, drejtoreshës iu deshën veç një faqe e gjysmë shkrim për raportim para Kuvendit. Nga kjo faqe e gjysmë heqim përshkrimin e aktiviteteve të planifikuara që janë marrë nga organogrami e komunës dhe mbetet veç një gjysmë faqeje nga Drejtoria për Pronë, Gjeodezi dhe Kadastër. Këtu shihet puna e kësaj Drejtorie”, është shprehur Donjetë Sheqiri.

Sipas saj, në këtë një faqe e gjysmë raport, janë paraqet 13 raste të uzurpimit të pronës komunale.

“Por, nuk tregon se cilat janë ato prona, sa janë në total prona të uzurpuara? Qe dy vite keni premtuar se do t’i publikoni në ueb-faqen e komunës listën e të gjitha pronave komunale dhe gjendjen e tyre, pse asnjëherë nuk i publikuat ashtu siç e parasheh Ligji? Kur do t’i publikon? Te shpronësimi i pronave shoqërore të kooperativave në Livadicë, Surkish dhe Obrançë, drejtoresha na sjell një shifër marramendëse që me përkthye na del 4,572 hektarë e që besoj që sipërfaqja e tërësishme e këtyre tri pronave kadastrale nuk e arrin këtë sipërfaqe”.

Ajo e ka pyetur drejtoreshën e këtij dikasteri, Saranda Stubllën se nga do t’i marrin mjetet për ta paguar 20 për qind të asaj sipërfaqeje që, siç ka thënë, është obligim ligjor.

“A mundesh me na tregua drejtoreshë se a janë regjistruara disa prona të kontestuara në Orllan dhe po ashtu te Fabrika e Armaturës? Këtu paraqiten 2062 raste të regjistrimit të pronave, por nuk paraqiten se cilat. Sa prona shoqërore janë bartur në prona private dhe nëse janë bartur kërkoj që të na i sillni në Kuvend me aktvendim, aktgjykim dhe dokumentacion përkatës”.

Ajo ka thënë se është vonuar edhe regjistrimi i pronave.

Në anën tjetër, drejtoresha, Saranda Stublla, ka thënë se sipërfaqja e shpronësuar në ato tri fshatra është 45 hektarë e 72 ari e 92.41 metra.

“Ne si drejtori e kemi për obligim vetëm elaboratin me përgatit në bazë të kërkesës që e dërgojmë në Qeveri, sepse kanë qenë prona të kooperativës bujqësore dhe ne e kemi përgatit elaboratin e shpronësimeve. Pasi janë përfunduar të gjitha procedurat janë ardhë në kadastër për regjistrim për me iu kthye pronat komunës. Sa i përket pronave në Orllan prej momentit që e kam marrë unë detyrën e deri më sot unë asnjë pronë nuk e kam regjistrua prej pronës komunale në prona private”, ka theksuar drejtoresha Stublla.

Ndërkohë, sa i përket pronës te Fabrika e Armaturës, ajo ka thënë se kanë pranuar kërkesë nga Prokuroria Speciale që të hiqet si aset i ngrirë, për arsye se, sipas saj, kanë përfunduar të gjitha procedurat ligjore.

Saranda Stublla ka thënë se janë duke e përgatitur edhe listën e përgjithshme të pronave komunale.

“Sa i përket listës së përgjithshme zyrtarët e pronës e kanë përgatitur listën e përgjithshme, mirëpo gjatë konsultës që e kemi pasur me gjeodetë, kemi ardhë në përfundim që ajo listë të përfundojë në duart e gjeodetëve për verifikim, pasi që janë afër 3 mijë prona, të cilat kanë mungesë të të dhënave.

Konsultë kemi pas edhe me Agjencionin Kadastral dhe ata na kanë thënë që edhe ata posedojnë listat e përgjithshme për secilën komunë dhe na kanë premtuar se shumë shpejt do të na sigurojnë listën e përgjithshme”, ka deklaruar Stublla.

Ndërkohë, shefi i Grupit të kuvendarëve të LVV-s, Haki Rudari, ka thënë se nuk duhet të anashkalohen punët e mira.

“Kemi aktivitete të planifikuara shumë të rëndësishme. Nuk është mirë t’i anashkalojmë punët e mira që janë kryer. Një gjë shumë e rëndësishme është edhe shpronësimi i pronave në Livadicë, Surkish e Obrançë ku nesër do të ketë investime në të mirë të qytetarëve, që nuk i kemi pas në të kaluarën”, ka thënë ai.

Në informatën e Drejtorisë për Pronë, Kadastër dhe Gjeodezi të paraqitur para kuvendarëve komunalë thuhet se sfiduese është mungesa e shënimeve në pjesën grafike, gabimet të cilat janë krijuar me rastin e rikonstruimit të disa zonave kadastrale nga Agjencia Kadastral e Kosovës.

“Sfiduese është komunikimi me institucionet, mospërgjigjet e tyre në afate ligjore të cilat na krijojnë probleme me palë dhe përfaqësues të palëve”, theksohet në këtë dokument./KOHA net/Nexhat Toverlani/