Komuna e Prishtinës kundër rikthimit të autobusëve ndërurban nga Podujeva te Xhamia e Llapit: Kërcënon me masa ndaj operatorëve

Shoqata e Transportit të Autobusëve Prishtinë – Podujevë ka bërë të ditur se nga e hëna kthimi i autobusëve nga Prishtina për në Podujevë do të bëhet nga Xhamia e Llapit, ashtu siç ka qenë më herët. Si arsye, operatorët përmendin mungesën e një stacioni të përshtatshëm që, sipas tyre, rrezikon sigurinë e nxënësve dhe udhëtarëve.

“Ky ndryshim është i domosdoshëm, sepse mungesa e një stacioni të përshtatshëm rrezikon sigurinë e nxënësve të shkollave, të qytetarëve të Llapit, si dhe të gjithë udhëtarëve që udhëtojnë në relacionin Prishtinë – Podujevë. Përderisa orarin e kemi nga Xhamia e Llapit, ligji është në anën tonë dhe na mbron në këtë vendim,” thuhet në deklaratën e Shoqatës.

Mirëpo, Komuna e Prishtinës ka reaguar menjëherë, duke i cilësuar këto veprime si shkelje të rënda të marrëveshjes së arritur mes palëve dhe rregullave komunale. Në një deklaratë zyrtare, Komuna paralajmëroi masa ligjore dhe administrative për të gjithë operatorët që nuk ndalojnë në Stacionin e Autobusëve të Prishtinës.

“Raportimet e fundit që tregojnë se disa operatorë nga Podujeva synojnë të ndalojnë në Xhaminë e Llapit janë shqetësuese dhe përbëjnë shkelje të qartë. Veprime të tilla nuk do të lejohen. Komuna do të ndërmarrë të gjitha masat ligjore dhe administrative të nevojshme për të siguruar respektimin e rregullave,” theksohet në reagim.

Komuna rikujton se ndalesat e paautorizuara në qendër të qytetit paraqesin rrezik për sigurinë në trafik dhe për rendin publik, ndërsa paralajmëron se licencat e operatorëve që nuk respektojnë itinerarin zyrtar mund të shpallen të pavlefshme.

Kjo përplasje mes Shoqatës së operatorëve të transportit dhe Komunës së Prishtinës ka nxitur debat mbi menaxhimin e transportit ndërurban dhe sigurinë e udhëtarëve, ndërkohë që udhëtarët mbeten të paqartë se ku do të ndalet autobusi i rradhës.