Komuna e Podujevës synon ta zgjerojë shërbimin e grumbullimit të mbeturinave

Në komunën e Podujevës vetëm për periudhën prej viti 2013 deri në tetor 2016 janë gjeneruar rreth 34000ton mbeturina nga amvisëritë, ndërsa mbi 9000 ton nga mbetjet inerte ( mbeturina të ndërtimeve).

Sipas të dhënave zyrtare të afruara nga dy kompanitë që operojnë në Komunën e Podujevës, vetëm 49% e amvisërive janë pjesë e shërbimit të grumbullimit të mbeturinave, ndërsa shërbimet ofrohen në 51 njësi (fshatra) nga 78 sa ka gjithsejtë komuna e Podujevës, apo shprehur në përqindje 65%.

Në mbledhjen e fundit të Kuvendit Komunal të Podujevës të mbajtur më 28 dhjetor, në mënyrë unanime dhe me përkrahje të të gjitha subjekteve politike të përfaqësuara në Kuvend, Plani Lokal i Menaxhimit të Mbeturinave i Komunës së Podujevës, është votuar duke marr dritën e gjelbër me qëllim të daljes në diskutim publik. Diskutimi Publik është procedurë e rregulluar me ligjet në fuqi, që ka për qëllim parësor pjesëmarrjen qytetare në vendimmarrje. Gjatë kohës sa do të zgjas diskutimi publik, qytetarët kanë mundësi që në formë të shkruar ti paraqesin vërejtjet e tyre dhe më pas do të kthehet prapë në kuvend për aprovim i cili më pas do të behët i obligueshëm për zbatim.

Sipas ligjit në fuqi nr. 04/L-060  “Për menaxhimin e mbeturinave”, komuna ka qenë e obliguar ti ndërmarrë shumicën e këtyre masave që parashihen në këtë plan veprimi, por deri më sot asnjë hap konkret se ka bërë. Mbetet të shihet në vitet e ardhshme. /PodujevaPRESS/