Komuna e Podujevës siguron stafin mjekësor me policë |PAMJE

Për të siguruar personelin shëndetësor në Qendrën Emergjente, Komuna e Podujevës ka nënshkruar marrëveshje me Policinë e Kosovës e cila është bërë pas disa sulmeve që kanë ndodhur ndaj mjekëve në Qendrën Kryesore të Mjekësisë Familjare në këtë komunë. Mjekët dhe stafi e kanë mirëpritur këtë marrëveshje, e cila për një vit Komunës do t’i kushtojë mbi 17 mijë euro

Policia e Kosovës është duke u ofruar siguri në punë punonjësve shëndetësorë në Qendrën Emergjente në Podujevë. Kjo ka ndodhur me marrëveshjen e nënshkruar nga Komuna dhe Policia e Kosovës, pas disa incidenteve që kanë ndodhur në Qendrën Kryesore të Mjekësisë Familjare. Marrëveshja nënkupton që në dy orare të plota gjatë ditës të qëndrojë nga një polic. Ky angazhim i dy policëve nga 8 orë në ditë, Komunës do t’i kushtojë 17 mijë e 619 euro.

“Gjatë muajve të fundit është shfaqur një dukuri në Qendrën Kryesore të Mjekësisë Familjare në Podujevë, konkretisht në Emergjencën e qytetit në të cilën personeli shëndetësor për shkak të vëllimit të madh të punës kanë pasur presione të vazhdueshme nga ana e qytetarëve-pacientëve të cilët ndoshta ndonjëherë për shkak të vonesave në ofrimin e shërbimeve janë kërcënuar dhe janë sulmuar nga ana e qytetarëve”, ka thënë Fatri Zhitia, zëdhënës i Komunës së Podujevës. “Kërkesën e personelit shëndetësor atje e kemi realizuar tashmë me një marrëveshje me Stacionin Policor këtu në Podujevë dhe nga 1 korriku i këtij muaji ka filluar që kjo marrëveshje të zbatohet dhe tashmë nga një polic qëndron gjatë dy orareve të plota të punës në Qendrën Kryesore të Mjekësisë Familjare në ofrimin e sigurisë për personelin shëndetësor, por gjithashtu edhe për pacientët”.

Sulmi i fundit që ka ndodhur në Qendrën Emergjente në Podujevë është ndaj mjekut Arben Beqiri, që është edhe shef i kësaj qendre. Ai ka thënë se për shkak të ndonjë pritjeje si rezultat i fluksit të madh të pacientëve, personeli mjekësor shpesh është sulmuar nga pacientët dhe familjarët e tyre.

“Për shkak të sjelljes agresive të disa pacientëve edhe familjarëve të tyre pas marrëveshjes që e ka bërë Policia me Komunën, jemi shumë më të sigurt. Prej momentit që është prezent policia nuk kemi raste me sulme fizike ose sulme verbale, për shkak se vetë prezenca e Policisë këtu i ka qetësuar rastet. Domethënë është sjellja më e mirë e pacientëve ndaj personelit mjekësor, që kemi pasur nevojë edhe shumë më herë me qenë policia këtu. Ndihemi më të sigurt në punën tonë që me punua ne me protokolle e standarde”, ka thënë Arben Beqiri.

Marrëveshjen ndërmjet Policisë së Kosovës dhe Komunës së Podujevës e ka mirëpritur edhe drejtori i Qendrës Kryesore të Mjekësisë Familjare, Ymer Llugaliu. Ai ka thënë se pas prezencës së Policisë më nuk kanë pasur asnjë incident.

“Pas disa incidenteve që ndodhën ne e bëmë një kërkesë si Drejtori e QKMF-së në Drejtorinë e SHMS-së, e cila përmes mekanizmave të tjerë ka realizuar një marrëveshje, e cila është shumë e mirëseardhur dhe punëtorët tanë shëndetësorë po ndihen shumë të sigurt në kryerjen e shërbimeve shëndetësore ndaj qytetarëve dhe pacientëve tanë”, ka theksuar Ymer Llugaliu. “Vetë prezenca e uniformës së policisë po jep një arsye se ka një rend, një rregull, një siguri si të punëtorëve shëndetësorë ashtu edhe të qytetarëve dhe pacientëve”.

KOHA ka adresuar pyetje edhe në Policinë e Kosovës, por deri në momentin e raportimit nuk ka marrë përgjigje. Marrëveshja njëvjeçare ndërmjet Komunës së Podujevës dhe Policisë së Kosovës ka hyrë në fuqi më 1 korrik të këtij viti dhe përfundon më 30 qershor 2023. KOHA.net/N.Toverlani