Komuna e Podujevës pa bibliotekë, u rrënua për të ndërtuar rrugë

Studenti T.Sh nga Komuna e Podujevës ka treguar se afati i provimeve të janarit e ka zënë shumë keq, pasi që nuk po gjen një vend të qetë për të mësuar.

Sipas tij, zgjidhja ideale do të ishte biblioteka e qytetit në të cilën kishte mësuar para disa muajsh, në kohën kur objekti i bibliotekës nuk ishte rrënuar për ndërtimin e një rruge në Podujevë.

“Është shumë e vështirë, më duhet me mësu për afatin e provimeve të janarit dhe të udhëtoj cdo ditë në Prishtinë nuk mundem” ka thënë T.Sh për Indeksonline.

Studenti ka treguar se sidomos gjatë kohë se provimeve, Biblioteka e qytetit të Podujevës mbushej plotë me studentë që përgatiteshin për provime.

Komuna e Podujevës ka gjashtë muaj që e ka lënë qytetin pa objekt të bibliotekës, duke e rrënuar për të ri konstruktuar të ashtuquajtur “Rrugën e Xhamisë”, e cila tashmë ka përfunduar asfaltimin dhe është hapur për qarkullim. Por, për nxënësit, studentët apo thjeshtë adhuruesit e librit në këtë qytet ende nuk është gjetur një zgjidhje që ka të bëjë me bibliotekën dhe një hapësire pë lexim.

Zyrtarët në Komunën e Podujevës kanë thënë për “Indeksonline” se ky objekt ishte rrënuar për tu realizuar projekti i ndërtimit të rrugës së re, të njohur si “Rruga e xhamisë”

“Objekti i vjetër administrativ në Podujevë, në të cilin ka qenë e vendosur edhe biblioteka e qytetit, është rrënuar, për t’u realizuar projekti i ndërtimit të rrugës së re” kanë thënë zyrtarët për informim në këtë Komunë.

Sipas tyre, biblioteka e qytetin deri në ndërtimin e objektit të ri, do të transferohet përkohësisht në objektin ekzistues të administratës komunale. Por një datë se kur do të ndodh, nuk është dhënë nga ana e Komunës.

“Rruga tashmë është ndërtuar, kurse biblioteka e qytetit, deri në ndërtimin e objektit të ri, do të transferohet përkohësisht në objektin ekzistues të administratës komunale” thuhet në përgjigje.

Zhvendosja e bibliotekës në objektin ekzistues të administratës komunale, do të bëhet atë herë kur administrata komunale të zhvendoset në objektin e ri.

Por, objekti i ri i administratës në Podujevë ka nisur ndërtimin në viti 2011 dhe ende nuk ka arritur të finalizohet, temë kjo me të cilin portali “Indeksonline” është marrë disa herë.

“Kjo do të ndodhë shumë shpejt, menjëherë pasi administrata komunale të zhvendoset në objektin e ri, ku aktualisht janë duke u kryer disa punë në bazë të vërejtjeve të komisionit për pranim teknik” thuhet në përgjigjen e Komunës.

Rikujtojmë që ditë më parë Lëvizja Vetëvendosje kishte marr një aksion për tu dal në ndihmë nxënësve duke u ndarë libra në mungesë të bibliotekës./Indeksonline/