Komuna e Podujevës mbajti takim në kuadër të fushatës “16 Ditë Aktivizëm Kundër Dhunës ndaj Gruas”

Gra, burra dhe vajza u mblodhën sot në sallën e Kuvendit Komunal të Podujevës për të shënuar aktivitetin “16 Ditë Aktivizëm Kundër Dhunës ndaj Gruas”, duke diskutuar për këtë çështje shumë të rëndësishme dhe aktuale në vendin tonë.

Këtë takim e udhëhoqi nënkryetarja e komunës, Marigona Lahu, e ku morën pjesë edhe drejtorë komunal, përfaqësues nga Stacioni Policor në Podujevë, përfaqësues të Qendrës për Punë Sociale dhe psikologë, ky takim kishte për bazë informimin e të pranishmëve për mekanizmat institucional në trajtimin e kësaj çështje dhe u diskutua për inicimin e aktiviteteve që kanë për qëllim vetëdijesimin qytetarë kundër dhunës në familje.

Nënkryetarja Lahu në fjalën para të pranishmëve e dënoi rastin e mbrëmshëm të vrasjes së gruas shtatzëne në oborrin e Klinikës Gjinekologjike, duke kërkuar dënimin meritor për dorasin. Ajo foli për domosdoshmërinë e forcimit të mekanizmave ndërinstitucional në parandalimin e rasteve të tilla dhe angazhimin e institucioneve e organizatave për vetëdijësimin qytetar kundër dhunës në familje, e dhunës ndaj grave.

Përfaqësueset nga Policia e Kosovës dhe Qendra për Punë Sociale folën për domosdoshmërinë që të raportohen rastet e dhunës në familje dhe dhuna ndaj grave, e për këto raste që janë shtuar në vitet e fundit, përfaqësueset e këtyre institucioneve kërkuan nga të pranishmit që rastet e dhunës të raportohen, e të mos mbeten të izoluara, por duke i raportuar e bashkëpunuar me institucionet relevante që ndaj kryersve të këtyre akteve të ndërmirren hapa konkretë.

Fushata Kundër Dhunës ndaj Grave ka filluar më 25 nëntor Ditën Ndërkombëtare për Eliminimin e Dhunës ndaj Gruas, dhe do të përfundoj me 10 dhjetor, në Ditën Ndërkombëtare për të Drejtat e Njeriut.

Kosova vetëm këtë vit numëron rreth 2067 raste të dhunës në familje prandaj, aktivizohu edhe ti për t’i dhënë fund dhunës ndaj gruas!