Komuna e Podujevës i ndan 200 mijë euro për subvencionimin e bizneseve prodhuese

Komuna e Podujevës i ka ndarë 200 mijë euro për subvencionimin investimeve në kapacitetet prodhuese. Në thirrjen e Drejtorisë për Planifikim dhe Zhvillim thuhet se Komuna e Podujevës do të subvencionojë 30 për qind të vlerës së investimit në kapacitetet prodhuese (maksimumi 10 mijë euro për një përfitues).

“Programi (fondi) për subvencionimin e investimeve në prodhim do t’i përkrahë bizneset që kombinojnë njohuritë, kapacitetet, aftësitë dhe resurset për të zhvilluar konceptin e prodhimit brenda ndërmarrjes, për të stimuluar përmirësimin e proceseve, prodhimin dhe përpunimin e produkteve të reja, qasjen në financa, si dhe rritjen e potencialit për eksport që nënkupton në subvencionimin e bizneseve prodhuese, përkatësisht subvencionimi për biznese të cilat investojnë në blerjen e makinerive prodhuese”, thuhet në këtë thirrje e që flet për qëllimin e këtij fondi.

Tutje thuhet se Drejtoria për Planifikim dhe Zhvillim Ekonomik e Komunës së Podujevës përkrah me prioritet sektorin privat me qëllim të zhvillimit ekonomik të Komunës së Podujevës, të bazuar në ekonomi të dijes, risi në prodhim apo përpunim, digjitalizim të sektorëve, zhvillimin e proceseve në NMVM-të ekzistuese dhe teknologji të reja.

“Grantet do të përdoren për të mbështetur suksesin dhe konkurrueshmërinë e idesë së përfituesve për të përmbushur objektivat specifike si në vijim: Përmirësimin e proceseve të punës, prodhimin dhe përpunimin e produkteve, rritjen e kapaciteteve eksportuese, kursimin e energjisë elektrike, hapjen e vendeve të reja të punës, rritjen e konkurrueshmërisë”.

Në këtë thirrje gjithashtu thuhet se Drejtoria për Planifikim dhe Zhvillim Ekonomik e Komunës së Podujevës me theks të veçantë përkrahë veprimtaritë dhe sektorët që kanë ndikim në zhvillimin ekonomik dhe rritjen e cilësisë në: prodhim dhe përpunim, industri ushqimore, efiçiencë të energjisë dhe inovacione.