Komuna e Podujevës dhe Ambasada e Japonisë në Kosovë me projekt të përbashkët kanë furnizuar shkollën teknike me kabinete

Sot gjatë ditës në ShMLT “Fan S. Noli” është bërë inaugurimi i kabineteve për lëndët Energjetikë dhe Instalim Elektrik, Automekanikë, Ngrohje dhe Klimatizim. Ky projekt është realizuar në bashkëfinancim mes Komunës së Podujevës dhe Ambasadës së Japonisë në Kosovë.

Në këtë ceremoni morën pjesë Ambasadori jorezident i Japonisë në Kosovë, z. Akira Mizutani, nënkryetarja e Komunës, Marigona Lahu, zëvendës-ministri i MASHT-it, Dukagjin Pupovci, drejtori i Arsimit, Avni Fetahu, drejtori i shkollës teknike, Fatmir Emini, mësimdhënës e nxënës të kësaj shkolle.

Vlera totale e projektit është 46,667 euro, ku Komuna participon me 8,667, ndërsa Ambasada me 38 mijë euro.

Nënkryetarja Lahu në fjalën e saj para të pranishmëve e falënderoi ambasadorin z. Mizutani për ndihmën e ofruar nga ambasada dhe populli japonez për Komunën e Podujevës, dhe tha se këto kabinete do të ndihmojnë shumë që nxënësit e kësaj shkolle mësimin teorik ta lidhin me atë praktik, e që do të ndikojë drejtpërdrejt në avancimin e tyre profesional.

Ambasadori Mizutani tha se ndjehet shumë i lumtur që kanë arritur të realizojnë këtë projekt në Komunën e Podujevës dhe u zotua se bashkëpunimi i shkëlqyeshëm me komunën do të vazhdojë edhe në të ardhmen në realizimin e projekteve të tjera, veçmas në fushën e arsimit.