Kompania Rajonale e Ujësjellësit “Prishtina” borxhlinjve të ujit u mundëson të paguajnë në këtë mënyrë

Kompania Rajonale e Ujësjellësit “Prishtina” ka ndërmarrë nismën për mbledhje të borxheve, duke eliminuar procedurën e përmbarimit dhe duke ua lehtësuar konsumatorëve pagesën.

Sipas njoftimit të KRU Prishtina, amvisëria ka mundësinë që të paguajë 10 për qind të borxhit, kurse pjesën tjetër ta programojë me këste për 36 muaj, kurse biznesi të paguajë 20 për qind dhe pjesën tjetër ta programojë me këste për 24 muaj.

KRU ”Prishtina” këtë nismë ka quajtur “masë lehtësuese”.

“KRU ‘Prishtina’ sh.a., qëllimin kryesor e ka ofrimin e shërbimeve të furnizimit me ujë të pijshëm për të gjithë konsumatorët në zonën e shërbimit. Për të përmbushur këtë mision me sukses dhe për të ofruar furnizim stabil me ujë të pijshëm e cilësor, sigurisht që kërkohet angazhim maksimal dhe ka kosto të lartë në trajtimin e ujit dhe mirëmbajtjen e rrjetit të ujësjellësit në vazhdimësi. Në mënyrë që t’ju ofrohet ky shërbim cilësor kërkohet nga ju që, të përmbushni obligimin tuaj ndaj pagesës së faturave të rregullta mujore për shpenzimin e ujit.

Masat lehtësuese për t’ju shmangur procedurave përmbarimore përfshijnë sektorin e amvisërisë dhe bizneseve”, thuhet në njoftimin e kësaj kompanie.

Borxhi i konsumatorëve ndaj KRU “Prishtina” është mbi 45 milionë euro.