“Kom me ta vra vëllain”/ Vizitorja kërcënon zyrtaren në Qendrën Edukuese Korrektuese për të mitur në Lipjan

Zyrtarët shtetërorë, duke përfshirë edhe pozita të larta të shtetit shpesh kanë qenë cak i kërcënimeve nga persona e grupe të ndryshme dhe për pasojë kanë kërkuar ndihmë e mbrojtje nga Policia. Për një rast të tillë tashmë ka nisur hetimet Prokuroria Themelore në Prishtinë, pas denoncimit të një rasti ku viktimë është një zyrtare e Qendrës për Punë Sociale, raporton Gazeta Sinjali.

Burimet e Gazetës Sinjali brenda Prokurorisë bëjnë me dije se e gjithë ngjarja ka ndodhur në Qendrën Edukuese Korrektuese për të mitur në Lipjan, ku viktima ushtron detyrën e saj.

Bazuar në dëshminë e 33-vjeçares, një grua e cila kishte shkuar për vizitë te djali i saj në këtë qendër, e ka kërcënuar zyrtaren se do t’ia vrasë vëllain.

Si rezultat i denoncimit, njësitë policore kanë arrestuar 43-vjeçaren dhe e njëjta është shoqëruar në stacion policor për intervistim.

Pas përfundimit të procedurave policore, Prokurori i Shtetit ka nxjerrë aktvendim që të dyshuarës t’i caktohet masa e ndalimit policor nën dyshimet për kryerjen e veprës penale ‘Kanosje’.