Kolona të gjata në Vranidoll, reagon ministri në detyrë i Infrastrukturës Durmishi

Pas reagimeve të shumta të qytetarëve për kolona të gjata dhe vështirësi në qarkullim në fshatin Vranidoll, ka reaguar ministri në detyrë i Infrastrukturës, Hysen Durmishi.

Ai ka bërë të ditur se punimet në rrugën Prishtinë – Podujevë janë drejt përfundimit, ku sipas tij rreth 85 për qind e projektit tashmë ka përfunduar. Pjesa e mbetur prej 15 për qindësh përfshin ndërtimin e urave dhe nyjeve rrugore. Durmishi theksoi se pas vendimit të fundit për shpronësim është hapur rruga që punimet të vazhdojnë edhe në këto segmente dhe se me fillimin e sezonit ndërtimor në pranverë do të ketë punime intensive për përfundimin sa më të shpejtë të projektit.

Sa i përket by-pass-it te ura në Vranidoll, ministri në detyrë sqaroi se reshjet e shiut kanë shkaktuar krijimin e disa gropave në rrugë, të cilat kanë ngadalësuar qarkullimin sidomos gjatë orëve të pikut në mëngjes dhe pasdite, nga ora 16:00 deri në 18:00. Ai theksoi se përkundër kësaj, komunikacioni nuk është ndërprerë në asnjë moment.

Durmishi bëri të ditur se sapo ka pranuar shqetësimet e qytetarëve, ka dalë personalisht në terren për të parë situatën dhe se është ndërhyrë menjëherë për sanimin e gropave. Sipas tij, janë vendosur edhe makineritë përkatëse, të cilat do ta përcjellin situatën dhe do të reagojnë sipas nevojës.

Në fund, ministri në detyrë ka apeluar për kujdes të shtuar në komunikacion, duke rikujtuar se jemi në sezon dimëror, ku pas reshjeve të shiut dhe borës, si dhe temperaturave nën zero, ngricat në rrugë janë të pritshme. Ai theksoi se rrugët janë mirëmbajtur dhe pastruar rregullisht, por kërkohet përshtatje e shpejtësisë me kushtet e rrugës.

Podujevapress.net do të vazhdojë të përcjellë zhvillimet rreth këtij projekti rrugor dhe ndikimin e tij në qarkullimin e qytetarëve.