Koalicioni VV–PDK në Podujevë konfirmohet edhe përmes urimit të Bulliqit për Isak Shabanin

Zhvillimet e fundit në Kuvendin Komunal të Podujevës po e konfirmojnë gjithnjë e më qartë bashkëpunimin politik ndërmjet Lëvizjes Vetëvendosje (VV) dhe Partisë Demokratike të Kosovës (PDK) në nivel lokal.

Sot, me 21 vota pro dhe një abstenim, Isak Shabani, kryetar i degës së PDK-së në Podujevë, u zgjodh Kryesues i Kuvendit Komunal të Podujevës.

Zgjedhja e tij është pasuar edhe nga një reagim publik i kryetarit të Komunës, Shpejtim Bulliqi, i cili përmes një shkrimi ka uruar Shabanin për detyrën e re.

“Isak Shabani është zgjedhur sot Kryesues i Kuvendit Komunal të Podujevës me shumicë të votave nga kuvendarët.

E uroj për detyrën e re z. Shabanin dhe i shtrij dorën e bashkëpunimit, me bindjen se përmes punës së përbashkët do t’i shërbejmë më së miri qytetarëve të Podujevës”, ka shkruar Bulliqi.

Ky qëndrim i kryetarit Bulliqi është interpretuar nga opozita si konfirmim politik i bashkëpunimit VV–PDK, sidomos pas akuzave të mëhershme të LDK-së, e cila e ka cilësuar procesin si “farsë” dhe ka refuzuar pjesëmarrjen në votim.

Sipas burimeve të PodujevaPRESS, marrëveshja ndërmjet VV-së dhe PDK-së përfshin edhe ndarjen e dy drejtorive komunale, atë të Administratës dhe të Bujqësisë, duke e bërë këtë bashkëpunim më shumë sesa një marrëveshje procedurale.