Kjo ndodhi sot në Podujevë, qytetarët vërshojnë në markete pa mbrojtje dhe pa ruajtur distancën

Nga e mërkura qytetarët mund të dalin nga shtëpuitë e tyre për vetëm një orë e gjysmë, për t’u furnizuar me ushqime apo për të kryer ndonjë punë tjetër. Kjo, pasi Ministria e Shëndetësisë e autorizuar nga Qeveria, të hënën prezantoi masat e reja të kufizimit të lëvizjes së qytetarëve për të parandaluar përhapjen e koronavirusit në Kosovë

Pritje të gjata e grumbuj njerëzish ka pasur sot në shumicën prej qyteteve të vendit. Qytetarët kanë dalë sot për t’u furnizuar me produktet e nevojshme, pasi nga e mërkura fillon orari i ri i lëvizjes ku secili qytetar lejohet të dalë nga shtëpija vetëm 1 orë e gjysmë.

Lexues të Gazetës Express kanë dërguar foto nga një market në Podujevë, ku shihet se qytetarë të shumtë kanë dalë për t’u furnizuar me gjërat e nevojshme ushqimore e higjienike.

Aty shihet se qytetarët nuk kanë masa mbrojtëse dhe nuk po ruajnë distancën e rekomanduar nga Instituti Kombëtar i Shëndetit Publik të Kosovës.

E kolona të gjata janë krijuar pothuajse në shumicën e qyteteve të Kosovës. Qytetarët po e shfrytëzojnë edhe të martën për të kryer nevojat e tyre si blerjet nëpër markete dhe furnizimi me gjërat e nevojshme.

Krejt kjo, pasi Ministria e Shëndetësisë ka marrë një vendim të ri për lëvizjen e qytetarëve i cili hyn në fuqi të mërkurën.

Në bazë të këtij vendimi, që nga data 15 prill në orën 06:00, qytetarët e Kosovës nuk do të lejohen të dalin nga shtëpitë. Ata do të kenë të drejtë të lëvizin në rrugë vetëm për 1 orë e gjysmë në ditë, madje vetëm për nevoja thelbësore.

E daljen e tyre, qytetarët e kanë të caktuar në bazë të numrit të parafundit në letërnjoftimin e tyre.