Këta janë kandidatët për deputet nga VV, LDK dhe PDK në Podujevë | FOTO

Këshilli i Qendrës së Lëvizjes VETËVENDOSJE! në Podujevë, e ka mbajtur mbledhjen e jashtëzakonshme për të zgjedhur kandidatët për deputetë nga Qendra e Podujevës, në zgjedhjet e jashtëzakonshme që do të mbahen me 14 shkurtë thuhet në njoftimin e kësaj partie. Anëtarët e Këshillit të Qendrës në një proces tranparent e demokratik, kanë votuar për të zgjedhur kandidatët për deputetë dhe tre kandidatët më të votuarit nga ky proces janë: Fitim Haziri, Saranda Bogujevci dhe Vendenis Lahu.

Ndërsa në listën e LDK-së për zgjedhjet e 14 shkurtit do të jenë gjashtë kandidatë nga Podujeva, ku kësaj liste i prin ish-kryetari i kësaj komune, Agim Veliu, njëkohësisht edhe ministër në detyrë i Brendshëm.

Kështu u bë e ditur përmes një njoftimi të degës së LDK-së në Podujevë. Veliu kandidon pas një kohe të gjatë për deputet, pasi për disa mandate ishte kryetar i Podujevës, e së fundi edhe ministër në dy qeveri, Kurti e Hoti. Pos Veliut, kandidatë tjerë nga Podujeva për deputetë janë Fidan Rekaliu, Ekrem Hyseni, Visar Hoti, Fatlume Jaha dhe Zahide Gërvalla.

Kurse në bazë të burimeve që ka arritur të sigurojë PodujevaPRESS.net, dega e PDK-së në Podujevë pas konsultimeve që ka bërë kjo degë me strukturat e saj, deri më tani kandidat të sigurtë për deputet në Kuvendin e Kosovës do të jenë Floretë Zejnullahu dhe Isak Shabani.

Floreta ka qenë deputete e kësaj legjislature kurse Isak Shabani është një aktivist i njohur i cili garës për deputet i hynë për herën e parë.

Ditëve në vijim sipas burimeve tona priten edhe disa kandidat të tjerë ti bashkohen listës së kësaj partie në Podujevë.