Këta janë dy personat që u arrestuan për rëninen e kulmit në objektin e Komunës së Prishtinës

Prokuroria e Shtetit ka ndaluar dy persona në lidhje me rënien e çatisë në Komunën e Prishtinës, nga ku u lënda një qytetare, e cila gjendet ende në gjendje të rëndë në kujdes mjekësor.

Prokuroria ka njoftuar se njëri nga të ndaluarit është zyrtar i Komunës së Prishtinës, ndërsa tjetri përgjegjës i Kompanisë punuese.

Ky i fundit Behxhet Baftjaraj, personi përgjegjës i kompanisë ndërtuese  “NBT-ING” dhe tjetri është zyrtari i Komunës së Prishtinës, Ylber Jashari.

Gazeta Sinjali ka raportuar më 18 janar se si tenderin në vlerë prej 386 mijë eurove për rikonstruktimin e kulmit të komunës së Prishtinës e kishte fituar “NBT-ING” me bazë në Suharekë.

Pronar i kësaj kompanie tash figuron Behxhet Baftjaraj, por ajo në të kaluarën ishte udhëhequr nga Tahir Sopa, i arrestuar me akuzat për mashtrim, falsifikim, dhe keqpërdorim në prokurim publik.

Kulmi i objektit të komunës së re të Prishtinës është rrëzuar pas një ere të fortë, ku për pasojë një vajzë 23 vjeçe ka marrë lëndime të rënda.

Ajo po vazhdon të trajtohet në Qendren Emergjente të QKUK-së.