Kështu do të fillojë mësimi në Podujevë

Shkollat në Komunën e Podujevës nuk pritet të fillojnë mësimin sipas një skenari unik.

Nga tri modalitetet e propozuara nga Ministria e Arsimit, shumica e shkollave në këtë komunë do të nisin mësimin sipas skenarit A, që nënkupton fillimin e procesit mësimor në shkolla.

Por, tri shkolla fillore të qytetit dhe tri ato të mesme, për shkak të numrit të madh të nxënësve, do të fillojnë me skenarin B, që nënkupton mësim në shkollë dhe në distancë.

Edhe pse ende nuk është marrë një vendim për këtë, drejtuesit e shkollave thonë të jenë bërë gati për fillimin e procesit mësimor më 14 shtator, por ka dilema rreth mundësisë së rritjes së numrit të të infektuarve me virusin COID-19.

“Mendoj se për fillim, për ne skenari B është më i pranueshëm, për nxënësit tanë dhe për prindërit tanë”, ka deklaruar Fehmi Zeqiri, drejtor i shkollës së mesme ekonomike “Isa Boletini”-Podujevë.

Edhe drejtori i shkollës fillore “Naim Frashëri” në Podujevë, Skënder Haxhiu, thotë se është bërë dezinfektimi i objektit shkollor, janë furnizuar me maska dhe dezinfektues dhe se i kanë bërë edhe shenjëzimet para hyrjes së objektit.

Edhe ai preferon skenarin B, pasi shkolla “Naim Frashëri” numëron afërisht 1.100 nxënës.

“Duke i parë specifikat e shkollës, ne jemi përcaktuar me mësim të kombinuar. Klasat 1-5 do të mbajnë mësim çdo ditë me orarë të shkurtuar sipas udhëzimit. Ndërsa klasat 6-9 do të shkojmë me mësim të kombinuar, një ditë në shkollë, një ditë në shtëpi, do të thotë me mësim online”, ka thënë Haxhiu.

Në anën tjetër, drejtori për Arsim në Podujevë, Agim Blakçori, thotë se janë të gatshëm për cilindo skenar që vendos Ministria, por preferon që në shumicën e shkollave të qytetit të fillojnë me skenarin B. Blakçori thotë se në shkollat e fshatrave nuk ka numër të madh të nxënësve dhe ka mjaft hapësirë.

“Kurse, sfidë do të mbesin shkollat në qytet dhe shkollat e arsimit të mesëm të lartë, ku numri i nxënësve është më i madh dhe këtu mund të kemi vështirësi në realizimin e skenarit A. Ndoshta këtu duhet të mendojmë të fillojmë me skenarin B e pastaj të shohim si po rrjedhin gjërat”, është shprehur Blakçori.

Zyrtarët komunalë thonë se në dy objektet e reja në fshatrat Bajçinë dhe Metehi, në të cilat procesi mësimor fillon për herë të parë, nuk do të mund të fillojë mësimi në rast se Ministria e Arsimit nuk i furnizon me inventar.

Në Komunën e Podujevës janë më shumë se 17 mijë nxënës që vijojnë mësimin parafillor, fillor dhe të mesëm të lartë.